Shillong, Lber 08 : Watla ka Sorkar Meghalaya bad ka Khasi Hills Autonomous District Council (KHADC) kila dep khylliap noh ia ka lynnong jong ka kam tih Uranium ha Meghalaya, hynrei mynta kawei ka kynhun Sengtrei monsngewbha na Nongkrem, kala phah dorkhas sha ka Sorkar India ba kyntu ban pynim biang ia ka kam ban ioh tih noh ia une u marpoh khyndew hapoh ka Jylla Meghalaya.
Kane ka seng ka dei kaba la tip da ka North East Sunshine Trust (India) kaba la register ha Shillong ha u snem 2022 bad kaba ai jaka treikam ha ‘Kensington, Kynton-U Mon, Lad Nongkrem.
Kane ka NEST (India) lyngba ka Founder Trustee bad Chairperson Kong Elizabeth Matthews Nongbri, kala phah da ka dorkhas sha u Dr Jitendra Singh, Myntri Khynnah ka Department of Atomic Energy, ka Sorkar India ba kyrpad ban pynim biang ia ka kam tih Uranium ha Meghalaya.
Kane ka dorkhas bala ioh copy da ‘kashlem.com’ ka dei kaba la phah myn ha ka 26 tarik u Rymphang, 2024.
Kat kum kane ka dorkhas, ka Kong Elizabeth Nongbri kala pynithuh ialade ba ka dei ka Khasi bad ka dei ka nongtreikam jong ka BJP naduh u snem 2015. Kala pynithuh ruh ba ka dei kaba iohlok shipai bad ba kala bat ia ki kam ba kongsan hapoh ka BJP Minority Morcha bad ruh kum ka National Executive Member.
Ka pyntip ba ha u Naiwieng 2023, ha ka Ex-Servicemen Conevntion ha Kurukshetra, kala iakynduh ia u Col Pravat Kumar Panda (retd) uba dei u Independent Director ka Uranium Corporation of India Limited (UCIL) bad une u kren halor ka jingpynim pat ia ka kam tih uranium ha Meghalaya.
Haba pyntip ba u Uranium u don kyrhai hapoh West Khasi Hills, ka kong Elizabeth kala iathuh ba ka NEST(India) kaba don ki briew ba ithuh ithaw ha ki shnong ki thaw bad ki stad ki jhad ban tih marpoh khyndew, ka lah ban pynurlong ia ka kam tih Uranium hapoh ka Jylla Meghalaya, kaba la pynduh pyndam ha u snem 2016 hadien ba ka Sorkar Jylla kala pynkut noh ia ka ai jingbit ban shim wai ia ki jaka ha West Khasi Hills bala iateh kular hapdeng ka Sorkar Pdeng bad Sorkar Jylla ha u snem 2009.
Ka Federation of Khasi Jaintia & Garo People kaba ioh copy lang ia kane ka dorkhas, kala pynpaw ia ka jingbitar ia ka NEST (India) bad maham ia ka Sorkar Jylla ba kam dei ban ailad ia kum kine ki Seng ba kin thaw jingkulmar hapoh ka Jylla.
U General Secretary ka FKJGP Bah Eldie N Lyngdoh ula ong ba ka kam tih Uranium ha Meghalaya ka dei ka kam kaba la pynkut naduh mynno namar ka jingpyrshah jur jong ki paidbah. Ula maham ia kane ka seng ba kam dei ban mushlia bad pynim biang ia kane ka kam lem kumta ka FKJGP kam banse ban tuklar bad leh ia kaba dei ban leh.
“Ka FKJGP bad kumjuh ruh kiwei ki Seng, kin ym ailad satia ia ka jingtih Uranium ha Meghalaya..Long kat kaba long, kane ka dei ka kam iap kam im jong ka Jaidbynriew” ula ong.
 kila dep khylliap noh ia ka lynnong jong ka kam tih Uranium ha Meghalaya, hynrei mynta kawei ka kynhun Sengtrei monsngewbha na Nongkrem, kala phah dorkhas sha ka Sorkar India ba kyntu ban pynim biang ia ka kam ban ioh tih noh ia une u marpoh khyndew hapoh ka Jylla Meghalaya.){kind=link}