Pher bak ly bak ka bai klas hapdeng ki college Sorkar bad college ba iarap ka Sorkar
Shillong, Lber 07 : Namar ka jingsngewkhia halor ka jingrem palat ka bai klas bala oh da ki college ha Jylla, ka Sorkar kala rai ban thaw noh da ka Committee ka ban shong bishar ia ka bai klas bala shim da ki college bapher bapher kiba ioh jingiarap na ka Sorkar ne ki Govt Aided College.
“Kane ka Committee kan hap ban bishar bha thik ba thik ia ka jingiapher ka jingshim bai klas jong ki jaka pule bapher bapher” ong u Myntri ka Tnad Pule Puthi Rakkam A Sangma haba iakren bad ki nongthoh khubor hynne ka sngi Palei.
“Ki lah ban don ki jingdonkam jong ki College-ia ka jingtei building, ban pyntyllun ia ki kam, ka song pisa sha ki kam pynroi-lada ka jingpynlut ka dei kaba shong nongrim kan bha palat hynrei lada palat, nga tharai na ka bynta ka bha ka miat ki kynnah,ka Sorkar kan hap wad ia ka lynti ban shim rai (ia ka kam)” ula ong.
Ula ong ba ka don ka jingiapher bak ly bak hapdeng ka jingoh bai klas da ki college ka Sorkar lem bad ki college ba ioh jingiarap na ka Sorkar hapoh ka Jylla.
U Myntri ula ai nuksa sha ka degree course (Bachelor of Arts), ka Kiang Nongbah Goct College, Jowai ka don 98 ki santion post da ka Sorkar bad kane ka college kala shim bai klas ba tang T. 7460 na ka bynta ka jingpule balai snem katba ka St. Anthony’s College, Shillong, kaba don haduh 101 ki sanction post da ka Sorkar, kala shim haduh T. 69,020.
Kumjuh ruh, ka Tura Govt College kaba don 86 ki sanction post da ka Sorkar, kala shim T. 15,260 na ka bynta ka jingpule degree ba lai snem haba ianujor bad ka St. Mary’s College, Shillong kaba shim haduh T. 84,780 ia kajuh ka course watla ka don 65 ki sanction post da ka Sorkar.
Ka St. Edmunds’ College, Shillong ka don 70 tylli ki sanction post da ka Sorkar hynrei kala shim haduh T. 95,720 na ka bynta ka jingpule degree b alai snem. Ia ka BA Media Technology , ka St. Anthony’s College kala shim haduh T. 1,90,120.
“Kala iapher bun shah ha ka jingshim bai klas da kine ki college, ia kiba la ai jingiarap da ka Sorkar….Nga sngew ba ngi dei ban iakren ia ka dor bai klas bad shim rai” ula ong haba bynrap “Haba kut jong ka sngi, kam dei satia tang ka kam bai klas hynrei ka dei ruh ka jinglong janai. Ki lah ban don katto katne ki samla pule kiba stad kiba kwah ban rung klas ha kine ki jaka pule kiba paw hynrei tang namar ka jingrem ka bai klas, kim shym la iohlad shuh”.
Nalor kane, u Myntri ula ban jur ba ki jaka pule kim dei ban kdat noh sharud ia ka jingthmu ba hakhmat jong ki “nab aka jingdon ki jaka pule ka long ban ai jinghikai, ka long ban saindur ia ka longbriew manbriew kaba bha”.
“Nga sngew ba hateng hateng ngi klet balei ba ngi ieng hangne mynta. Nga kyrpad ia baroh ki college, ngi dei ban kynmaw ia ka thong balei ngi don hangne, ngi don hangne mynta ban shakri ia ki para briew” ula bynrap.
