Shillong, Lber 06 : U Myntri Rangbah ka Jylla Conrad K Sangma ha ka sngi Balang, ula ong ba ka Sorkar kam shym la shim ram ban bei tyngka ia ki kam pynroi hapoh ka Jylla.
“Ngim shym la bei tyngka ia ki kam pynroi jong ngi da kaba shim ram” ong u Conrad haba iakren bad ki nongthoh khubor, ban kynthoh pyrshah ia ki seng sain pyrthei ka Liang Pyrshah ki bym sngap ia ka jubab jong u halor ka jingiatai ia ka mang tyngka ha ka Dorbar Mang Tyngka ba dang shu kut jong ka Iingdorbar Thaw Ain.
Ka Liang Pyrshah kala kynnoh ba ka Sorkar Jylla kala shu shim da ka ram ban pyntreikam ia ki kam pynroi bapher bapher hapoh ka Jylla.
“Ngam mynjur satia ia kane ka jingkynnoh. Nga la dep batai ia kane ha ka jingkren jong nga ia ka mang tyngka, kumta nga sngew ba ki (Liang Pyrshah) la dei ban shong bad sngap ia ka jubab jong nga. Ha ka por ba ki kren ma ki bad ba kin sngap ia ka jubab jong nga bad sa mynta biang hadien ba nga la jubab, kila kren biang ia kane ka kam, kumta ngam tip shuh shano ba ngan jubab ia kane ka jingkylli sha ki” ula ong.
U Conrad ula ong “Wat ki paidbah hadien ba ki iohi ia ka jubab jong nga ha kato ka sngi, kila sngewthuh ba ka jingpynlut baroh kaba la kiew haduh arshah ka dei namar kiba bun ki daw”.
U Conrad ula kdew “Ka bhah jong ngi na ka khajna ka Sorkar Pdeng kala long arshah n aka T.4000 klur sha ka T.9000 klur ha kine ki san snem bala leit. Ka khajna lajong kala kiew na ka T. 1700 klur ha u 2018 sha ka T.4700 klur kaba jankot lai shah ha kine ki san snem. Ka bhah jong ngi na ka skhim ka Sorkar pdeng, ka pisa ba ngi ioh kala jan kot lai shah lada ngi shim kyllum lang ia baroh ki skhim. Ka Externally Aided Project (EAP) jong ngi bad ka jingpynlut kala kiew san shah haba ianujor ia kaei kaba long ha ki snem bala leit noh bad ki EAP watla ki dei jong ka World Bank ka dei kaba la ai sudsidy haduh 72% da ka Sorkar India. Kumta, ngi la siew tang 28% bad kane ruh kam dei ka ram. Ngi la hap ruh lypa 28% bad ka GOI kala ai subsidy bad siew 72%”.
U Myntri Rangbah ula ong ba jin da ki MLA ka Liang Pyrshah kila shong ha Iingdorbar bad sngap ia ka jubab jong u ha ka sngi khatduh jong ka Dorbar Mang tyngka, thikna ba kin nym kylli shuh ia kane ka jingkylli na ka por sha ka por.
