Mang T.2800 klur ha ka Mang Tyngka sha ki Samla ka Jylla
Nongpoh, Lber 05 : U Myntri Rangbah ka Jylla Conrad K Sangma hynne ka sngi Ba-ar, ula buh mawnongrim ban shna ia ka madan Artificial Football Turf ha ka madan jong ka shnong Umbuda, kaba la pynmang pisa palat T. 10 klur.
Laid the foundation for Synthetic Artificial Turf at Umbuda in Ribhoi District alongside Sports Minister Shakliar Warjri. The sports infrastructure at Umbuda is being constructed at a cost of ₹10.93 cr.
Government is committed to create sports infrastructure across the State.… pic.twitter.com/BSBFTPxlMs
— Conrad K Sangma (@SangmaConrad) March 5, 2024
Kane kan dei ka madan ialehkai phutbol ba nyngkong eh ha Ri-Bhoi District ka ban siang da ki artificial turf ne ki phlang plastic. Ka dei ruh ka jingangnud kaba la slem bha jong ki paidbah ka thain kiba ieid ia ka jingialehkai phutbol.
Ia une u mawnongrim la buh ha ka jingiadonlang u Myntri ka tnad ialehkai Bah Shakliar Warjri, u MLA ka Nongpoh Bah Mayralborn Syiem, u MLA ka Jirang Bah Sosthenes Sohtun lem bad ki Ophisar ka State Sports Council, ka Directorate of Sports & Youth Affairs bad ki kynhun bapher bapher ka Ri-Bhoi.
Haba ai jingkren, u Myntri Rangbah ula ong ba kane ka dei ka sngi kaba dap da ki jingkyrkhu bad ka ban sah jingkynmaw na ka bynta kane ka thain ha kaba staang katto katne bnai, kan sa ioh noh ia ka madan ialehkai kaba bit kaba biang.
U Myntri Rangbah ula ong ba ki samla kila pawbha ha ki kam ialehkai bad wanrah medal bad ka nam ia ka Jylla lada ai ka lad ia ki. “Kane ka dei ka jingkut jingmut jong ka Sorkar bad ngin iai bteng ban kynshew ha ki kam ialehkai bad ka jingshna ia ki mdan” ula ong.
Ula pyntip ba ia mynta, ki project ba kot haduh T.700 klur la pynteikam ban shna ia ki madan ialehkai bapher bapher ha ka Jylla bad jan kot ia ka T. 400 klur la pynmang ha une u snem mang tyngka ban wan ban pyntrei ia ki madan ialehkai.
U Conrad ula iathuh ba ka Sorkar kala buh ia ka mang tyngka ba T.2800 klur na ka bynta ki samla, kaba kynthup ia ki kam ialehkai, ka put ka tem, ka kolshor bad ka sengjam sengjam, kiba ka jingthmu ka long ban sei pyrthei ia ka sap ba ki samla ka Jylla ki don.
Haba kren halor ka roi ka par ia baroh lang, u Myntri Rangbah ula ong ba lada ka Jylla ka dei ban roi, yn ym lah ban pyrrkhing ne pynleit jingmut tang ha Shillong, Tura bad Jowai hynrei manla ki shnong bad ki Constituency ruh ki dei ban jam shakhmat.
“Kumba 20 tylli ki madan artificial turf kin sa mih ha ki shnong nongkyndong jong ka Jylla kynthup ruh ia katto katne ki track and field Stadium” ula bynrap.
U Myntri Rangbah ula pynbna ba ka Ri-Bhoi kan sa ioh noh shen ia ka Track & Field Stadium.
U Myntri Rangbah ula ai khublei ia u Myntri ka tnad ialehkai bad ia ki Ophisar ka Tnad ialehkai ba kila trei shitom ban pynurlong ia kane ka kam kaba khraw.
Ula ong ba ka Sorkar bad ka Tnad ialehkai kila pynishisha ia ki kam kiba khraw ha kaban kyntiew ia ki kam ialehkai hapoh ka Jylla lada ia nujor bad ki snem kiba mynshwa naduh ba ioh ia ka Jylla Meghalaya.
