Shillong, Lber 03: U President ka National People’s Party (NPP), Meghalaya bad Symbud Myntri Rangbah Bah Prestone Tynsong ula pynshai ba ki jingkynnoh ba dei ka seng NPP kaba la khanglad ban pynrung ia ka Ktien Khasi ha ka Khyrnit kaba Phra kam long satia kaba shisha hynrei kadei tang ka jingthmu ban ialam bakla ia u paidbah ka jylla.
U Bah Prestone ula kynthoh ia kane ha ka jingialang jong ka NPP-Pynursla kaba la pynlong ha madan Urksew, PHE ha ka sngi saitjain.
“Ki jingkynnoh kiba bun jait kila mih bad saphriang, hana ba khanglad u Conrad Sangma namar ba ka ktien Garo ka khlem rung ha ka thup kyrteng, ‘hai re hai’ ka jingkren kaba stad haduh katta katta” ong u Bah Prestone.
“ Ngan shu iathuh ia phi ki paidbah jong ka Pynursla, ba ka ba khatduh eh kaba ka Sorkar India kala pynrung ia ki ktien ha ka Eight Schedule ne Khyrnit kaba Phra kadei ha u snem 2003-04 lait nangta ym don shuh” ula bynrap.
U Bah Prestone ula ong ba ki don sa kumba 40 tylli tam ki jait Ktien kiba ka Sorkar India haduh mynta kam pat lah ban rai bad kawei na kita kadei ka Ktien Khasi.
Une u Nongialam ka NPP ula ong bad katba ki briew ki dang tim bad ki dang ialam bakla, ka seng NPP kan dang kiew arshah namar ka NPP ka ngeit tang ha kawei ka nongrim kata ban shakri ia ki paidbah ka jylla Meghalaya.
“Paidbah jong ka Pynursla wat shah pynbiej bad nga thikna bha lada dei ba phi shah pynbiej nga la dei ban rem ha kane ka elekshon MLA 2023 pynban phi nang pyndon burom ia nga bad ai ba ka Pynursla Constituency kan dang ehrngiew kan dang ehdaw” ula ong
U Bah Prestone ula ong ruh “Ngin pynbna mynta ba ka Kong Ampareen kan dei ka kyrtong iakhun elekshon MP jong ka seng bad ngin ia mih nangne ban iatrei shitom bad trei shitrhem ha la ki kyntoit bad ki shnong ban pynjop don burom ia ka Kong Ampareen”.
Ha kane ka jingialang la ioh ruh ia ka jingkren na ka Kyrtong MP ka NPP ka Kong Ampareen Lyngdoh kaba long ruh ka Myntri Sorkar, Bah Wailadmiki Shylla, Bah Gavin Mylliem bad Kong Grace Mary Kharpuri bad ha katei ka jingialang la wan ban iadonlang ki heh nongialam ka NPP, ki nongialam ka NPP Pynursla bad ki paid nongkyrshan na ka thaiñ Pynursla.
