Shillong, Rymphang 29: U Myntri ka tnat Social Welfare u Bah Paul Lyngdoh haka jingdon ka Myntri ka tnat Ain Kong Amapreen Lyngdoh hynne ka sngi Palei, u la pyllait iaka kot jong ka POCSO Act 2012 kaba la pynkylla sha ka ktien Khasi “Ki kyndon ain”.
Ia kane ka program la pynlong ha Pinewood hotel Shillong.
Haba kren ha kane ka sngi u Bah Paul u la ong ba mynta ka sngi kad ei ka sngi sah jingkynmaw namar baroh kila ia lum lang naka bynta ki kam ba ktah ia ka longbriew manbriew bad ban rakhe iaka jinglong khynnah.
U Bah Paul u la ong ba ym baroh kila mad ka jingkmen haka jingim bad dei namar kane donkam kum ki nongthaw ain bad baroh ban iasnohkti lang ban rat dkhong iaki kam thombor iaki khynnah.
U la ong kane ka sngi kan dei ka sngi sah jingkynmaw namar haka sien ba nyngkong naduh u snem 1841 bala ioh ia u dak Khasi, mynta ka sngi la lah ban pynkylla iaka ain POCSO haka ktien Khasi.
U la ong “Ai lad ba ki mombati ba tbeh mynta ka sngi kin shon haki dohnud jong baroh khnang ba naduh ki nongthaw ain, ki kmie ki kpa, ki nongialam niam kin shim ka jingkitkhlieh ban pynthikna ban iada iaki khunlung khynnah ha Meghalaya”.
U Bah Paul u la ong ka jingkyrshan jong baroh hapoh ka imlang sahlang, kan tehlakam iaki kam shah thombor ki khynnah bad lyngba ka jingpynkylla iaka ain POCSO haka ktien Khasi, ka ain kan poi sha baroh ki longïng haki shnong ki thaw bad kane kan long ruh ka jinghikai ba mano mano kin nym lait naka kti jong ka ain.
U la kyntu ia baroh kiba don ha kane ka sngi ban shim ka jingbam smai ban iada iaki khynnah haka imlang sahlang naka bynta ban wanrah ka jingkmen haka jingim jong ki.
Ha kane ka sngi, ka Meghalaya State Commission for Protection of Child Rights kala pyllait ruh iaka Calendar bad ka kaiphod (Preliminary report) jong ki POCSO cases haki ïing kashari ka Meghalaya.
