Nongpoh, Rymphang 29: Ka Ophis District Medical & Health Officer (DM&HO) ka Ri-Bhoi District, hynne ka sngi Palei, kala pynlong ia ka rally ha Nongpoh ban ialap ia ka jingkordor ka jingai dawai polio ia ki Khynnah ba hapoh ka 5 snem.
Ha kane ka rally la pynbna ia ka prokram ai dawai polio hapoh ka District ka ban long ha ka 4, 5 bad 6 tarik u bnai Lber.
Kane ka rally kala sdang naduh ka shnong Pahamsyiem haduh ka Ophis ka DMHO Ri-Bhoi bad la wan iashimbynta da ki khynnah skulk a Oasis Secondary School.
Haba kren sha ki Nongthoh Khubor ka Kong G Warjri, District Health Education Officer Ri Bhoi District, ka la pynpaw ba ka tnad jong ka Koit ka Khiah ha Ri Bhoi District ka la pynkhreh ban pynlong ia ka programme ban ai dawai polio ia ki khyllung khynnah hapoh 5 snem ha ki jaka ai jingsumar bapher bapher ha kane ka District.
Ka la iathuh ruh, ba ha ka 4 tarik Lber kan don ka jing ai dawai polio ha ki jaka sumar paidbah ha baroh ka District bad ha ka 5 bad 6 tarik Lber pat ki nongtrei ka tnad ka Koit ka Khiah kin rung sha man ki thliew iing briew ban leit ai dawai polio ia ki khyllung ki bym pat ioh ia kane ka dawai.
Kala kyrpad ruh ia ki paidbah ban shim bynta ha kane ka programme khnang ba ki khyllung kiba hapoh 5 snem kin ioh ia kane ka dawai kaba kordor bad kaba donkam eh na bynta ka Koit ka Khiah Jong ki.
Ka DMHO ka pyntip ba ha ka 4 tarik kan don ki polio boots haman la ki shnong ruh ban ai dawai ia ki khyllung naduh ba dang kha haduh 5 snem. Ki kmie ki kpa ki lah ban leit ialam sha kine ki boots ban ioh ia ka dawai polio ban iada ia ki khyllung na kane ka jingpang polio ka bym lah ban pynkoit namar bym pat don dawai.
Kala ong ruh bawatla ha ri India kam don shuh kane ka jingpang hynrei namar ba ki don pat ki Ri kiba marjan kiba dang don ia kane ka jingpang kumta kane ka jing ai dawai polio kan long ka lad ban iada ia ki khyllung na kane ka jingpang polio.
