Shillong, Rymphang 28: U Myntri ka Tnad Pule Puthi Rakkam A Sangma ula pyntip ba ka National Testing Agency (NTA) kan sa buh ia lai tylli ki Common University Entrance Test (CUET) Centre ha Meghalaya.
Kat kum ka jingong jong u, kane ka jingpynkhreh ban buh ia kine ki centre kan sa long ha une u bnai ban wan.
Haba iakren bad ki nongthoh khubor hynne ka sngi Balang, u Rakkam ula ong b aka CUET eksam ka dei kaba buh jingeh bha ia ki samla pule ka Jylla.
“U Vice Chancellor ka NEHU ula iathuh ia nga ba ki don shibun ki jaka pule ba lait thylli namar ka jingbym pass ki khynnah jong ngi ia ka CUET eksam. Kane ka dei ka kam kaba sngewkhia bha” ula ong.
Namar kata, u ong ba ka Sorkar Jylla kala pyrshang kat kaba lah ban pynthikna ba ka Captain Williamson Sangma State University kan sdang treikam noh kham kloi.
“Ha ka State University, ngi don iala ka jong ka rukom treikma ban pynrung klas ia ki khynnah khlem da donkam ban ialeh ia ka eksam CUET” ong u Rakkam.
Lah ban kdew hangne ba ka Sorkar Jylla lyngba ka Under Secretary ka Tnad Pule Puthi Kong PG Tariang, kaba la phah da ka shithi sha baroh ki skul Higher Secondary bad College ka Jylla, ba kin phah pynkhreh iala ki jong ki samla pule ba kin hap ialeh ia ka eksam Common University Entrances Test (CUET) ban ioh leit pule Under Graduate bad Post Graduate ha ki University ka Sorkar Pdeng.
Kane ka jingbthah kala mih naduh ka 20 tarik Nohprah, 2023.
Kat kum kane ka shithi, ka Under Secretary ka pyntip ba ha u snem bala leit, ka Sorkar India kala pyllait ia ki samla pule ka Meghalaya ba kin iakhun ia ka eksam CUET ban ioh rung klas ha ki College kiba pyniasoh bad ka North Eastern Hill University (NEHU), Shillong haba ong pat ba kane ka jingpynjynsur ka lah ban nym don shuh ha ki snem ban sa wan.
Kane ka Ophisar kala pyntip sha baroh ki Khlieh pyniaid skul bad college ba kin pyntip ia kane sha ki samla pule bad ki kmie kpa khnang ba ki samla pule kin tip ba ka jingialeh ia ka eksam CUET ka dei ka bym lah ban iaid lait ban ioh rung klas ha NEHU bad kiwei ki Central University.
 kan sa buh ia lai tylli ki Common University Entrance Test (CUET) Centre ha Meghalaya.){kind=link}