Imphal, Rymphang 28: Ki Pulit kila ioh ban pyllait im ia u Additional Superintendent of Police IW Moramthem Amit Singh, uba shah rahbor ha ka miet sngi Ba-ar ha ka kynhun ki ehrang kaikhlaw.
Kat kum ka jingiathuh ki Pulit, kumba 200 ngut ki riew kiengatiar kila leit ban hiar thma ia ka Iing u Addl SP bad kila rahbor ia u ha ryngkat ki nongbud pahara na kane ka jaka kaba don ha Wangkhei Tokpan Leikai, kaba hap hapoh ka Porompat Police Station, Imphal East District.
Laiathuh ba kine ki riewkieng atiar kila pynjotpynpra ia ka Iingsah bad ki jingdon jingim jong une u Heh Pulit hashuwa ba kin rahbor.
Ki Pulit kila ioh ban pyllait ia un aka thain Kwakeithel Kongjeng Leikai bad la ialam mar mar ia u sha Raj Meditity ban ai ia ka jingsumar. Kilaregister case ruh halor kane ka jingjia bad ka jingtohkit mynta kala iaid shakhmat.
Haba ioh jingtip ia kane ka jingjia, ki bor pahara kila her wut wut sha jatei ka jaka, ha kaba kala mih ka jingiather kuli kaba jur bha. Ha kane ka jingiather kuli, arngut ki riewkiengatiar ba kyrteng u Rabinash Moirangthem bad u Kangujam Bhimsem, kila mynsaw jur na ka jingshei kuli.
Kine ki arngut kila don hapdeng ka jingsuar ha JNIMS Hospital kaba don ha Porompat.
