Shillong, Nailar 03: Ki shipai Indian Army Umroi Brigade kiba dei jong ka kynhun Red Horn Division, kila pynlong ia ka Freedom Ride-Trans Meghalaya Monsoon Odyssey, ka jingleit shang jaka da ki thuk thuk ha kane ka aiom lyiur sha baroh ki District ka Jylla kum shibynta ban rakhe ia ka jingdap 75 snem ka jingioh laitluid ka Ri India ne ka “Azadi Ka Amrit Mohatsav”.
Kane ka jingleit shang jaka da ki thuk thuk kala sdang hynne ka sngi balang 3 tarik Nailar bad kan kut haduh ka 10 tarik Nailar, kaba long 8 sngi. Ka kynhun ba 12 ngut ki nongniah thuk thuk kin iaid da ki thuk thuk ha baroh ki 12 tylli ki District ka Jylla ha ka jingjngai ba kot 1100 Km.
Kane ka kynhun kan leit ban iuhkjat ha ki jaka ba tei ia ki motsah nam jong ki laingut ki Nongiakhun laitluid ba pawnam ka Jylla Meghalaya –u Woh Kiang Nongbah, u Pa Togan Nengminja Sangma bad u Tirot Sing.
Kane ka kynhun kan pyndon burom ruh ia kine ki riewshlur kiba la iakhun naduh ka mynsiem bad len iala ka jong ka jingim ha ka jingiakhun ban pynioh laitluid ia ka Ri India na ka Ri Bilat.
Ia kane ka jingleit shang jaka da ki thuk thuk la pynher mala da u Lieutenant General DS Rana, AVSM, YSM, SM General Officer Commanding Gajraj Corps bad ia kane ka kynhun ki nongniah thuk thuk la ialam ia ka da u Brigadier K.M Shende, Shaurya Chakra, Station Commander Umroi Military Station.
Kane ka jingleit shang jaka ka dei kaba la pynlong ruh da ka jingthmu ban wanrah ia ka jingiajan bad iasngewthuh jingmut hapdeng ki paidbah bad ki shipai ka India Army bad ruh ban aimynsiem ia ki samla ka Jylla ba kin rung kamshipai.
Ia kane ka jingleit shang jaka jong ka kynhun Red Horn Division yn sa pynhap lama ha ka 10 tarik Nailar ha Umroi da u Lat ka Jylla u Satya Pal Malik.
