Bam duh ka ding ia ka Jaka treikam ka Shillong Bar Association, hiar jurip u CM

Shillong, Rymphang 24: Ka ding kaba klang bha, kala bam duh ia ka jaka treikam ne ka building jong ka Shillong Bar Association, kaba don marjan ka Ophis ka Deputy Commissioner (DC) East Khasi Hills hynne ka miet sngi saitjain por 10:30 baje eiei.

Ka Shillong Bar Association ka dei ka jaka shong treikam jong ki nongiasaid ain ka Nongbah Shillong. Ka dei ka jingtei kaba la tei naduh ka por jong ka sorkar Bilat, kata naduh u snem 1913 bad ka dei ruh kawei na ki jaka ki nongiasaid ain kaba la rim tam hapoh ka Ri.

Da ki hajar ki file jong ki case bapher bapher kynthup ia kito kiba dei naduh ki snem 1900 ter ter, kila kylla pui pui lut ha ka di.g kaba la bam duh ia kane ka Ophis.

Haba ioh jingtip ia kane ka jingjia, u Myntri Rangbah ka Jylla Conrad K Sangma, ula leit mar mar sha katei ka jaka ban peit ia ka jinglong jingman bad ban ai mynsiem ia ki pulit pynlip ding.

U Myntri Rangbah ula sah ha ka jingsha-iong ban iohi ia ka jingshyrkhei jong ka jingjulor bad kular ban ai jingiarap kat kaba lah ia ki nongiasaid ain jong ka Jylla.

U Myntri Rangbah ula ong ruh ba u sngew pangmet ban iohi ia kat kane ka jingpynjulor ia ka Ophis kaba dei u paia jong ka riti synshar paidbah naba u Kpa jong u (L) PA Sangma u dei ruh u nongiasaid ain barim jong ka Jylla.

Kat haduh ba thoh ia kane ka khubor, ym pat lah satia ban tip ia ki daw jong kane ka jingpluh ding bad nangno ka ding ka mih. Hynrei ka jingsuba kala mih ba ka lah ban dei na ka jingthut jong ki waiar bording.

Ki kali pynlip ding kila iaher wut wut sha kane ka jaka ban tem ia ka ding kaba la klang bha khamtam ba marjan kane ka Building, ki don ruh ki Iingkashari District Session Judge bad ka MPRO, kiba dei ki iingdieng kila la rim bha.