Boko, Rymphang 24: Ka Engineer jong ka MeECL ka Chonmei Rani T. Sangma, hynne ka step jong ka Sngi Saitjaiñ, kala khlad noh na ka jingmynsaw jur ha ka jingjia aksiden ha Boko kaba la jia haka miet jong ka Sngi Thohdieng.
Ka Chonmei ka don hapdeng jong ka jingshah sumar hapoh Critical Care Hospital, Lokhra ha Guwahati.
Hynnin ka miet ha ka por 9:30 ka kali kaba ki shong kala leit tynrah ia kawei ka trok kaba ieng hajan jongka Shiv Mandir Boko.
Ia katei ka kali Honda VRV la niah da u kurim jongka u Henry Sangma uba dei u Engineer jongka Urban Department jong ka sorkar Meghalaya, uba la mynsaw malu mala.
Kine ki shi kurim kila mih na Guwahati ban leit sha Tura, hynrei ka kali kaba kila shong kala leit tynrah ia kawei ka trok kaba ieng.
Ka Chonmei, kala shong shakhmat bad kala mynsaw ha ki bynta jong ka khlieh bad la pynkit noh mardor sha Boko PHC ban ioh ia ka jingsumar kaba mardor bad hadien kane la pynkit noh sha hospital ha Guwahati.
Ha ka por 3.45 mynstep, u Doctor ula pyntip ba ka Chonmei kala khlad noh na ka jingban jur jong ka jingmynsaw.
