Shillong, Rymphang 22 : Ka Sorkar Jylla kala pan ia ka jingiarap song pisa na ka Sorkar Pdeng ban tei ia ka Administrative City ba thymmai bad ka Knowledge City ha New Shillong Township (NST).
Haba ai jingkren halor ka mang tyngka hynne ka sngi Balang, u Myntri Rangbah ula iathuh ba jaka bah eh 232 acre la dei ban buh na ka bynta ban tei ia ka New Shillong Administative City, ka ban don ia ka Administrative Complex kaba heh bha, ka ban don ka Secretariat bad baroh ki Directorate.
Kane ka Administrative Complex la khmih lynti ba kan lut haduh T. 550 klur.
“Yn tei ruh ia ka Unity mall ha ka jingmang pisa ba T. 220 klur. Ka Administrative bad Police housing ruh yn tei nalor ki madan ialehkai bad kiwei kiwei, ka ban kot ia ka jingkynshew pisa ba T. 1200 klur” ula ong.
Nalor kane, u Myntri Rangbah ula ong ba katba ka Administrative City kan dei ka jaka treikam ka Sorkar, ka Knowledge City pat yn tei ha Mawkhanu-Mawpdang ha ka jaka ba heh 808 acre ia kaba la dep thied da ka Sorkar. Kane ka New Shillong Knowledge City kan phaikhmat eh sha ki kam ialehkai, IT, kam jngohkai bad kiwei kiwei.
“Ka DPR jong kane ka Nongbah kan long T. 5400 klur bad ngi la dep phah sha ka Sorkar India” ula ong haba bynrap b aka jingpyntrei ia ki project bapher bapher ha kane ka nongbah yn bei tyngka da ka Sorkar Jylla,ka Sorkar Pdeng bad lyngba ki jingkynshew ki riew shimet.
U Myntri Rangbah ula ong ba kine ki artylli ki Nongbah la khmih lynti ba kin ai kam haduh 50,000 ngut ki briew ha ka jingsiew kaba biang bha.
