Shillong, Rymphang 19: U National President ka National People’s Party Conrad K. Sangma ula pyntip ba ka seng NPP kala ioh ia ka jingkyrshan ha kylleng ki bynta jong ka jylla bad kane kala paw lyngba ka jingwan pyniasoh bun ngut ki nongialam bad ki nongkyrshan jong kiwei ki seng sain pyrthei.
U Conrad ula kren ia katei hynne ka sngi Nyngkong haka jingpdiang sngewbha ia ki 2 ngut ki MDC ka seng Congress kiba kynthup ia u Bah Batskhmen Ryntathiang u MDC ka Mairang bad u Bah Carness Sohshang u MDC ka Mawkyrwat constituency ryngkat bad u MDC barim ka Sohra u Bah Donevan Kharwanlang kiba la wan pyniasoh noh bad ka NPP.
U Conrad K. Sangma uba long ruh u Myntri Rangbah ka jylla ula ong, ba ka jingwan pyniasoh kine ki 3 ngut ki nongialam sha ka seng kan nang pynkhlain ia ka iing ka sem jongka NPP bad kan iarap ruh ha kaban lah ban pynurlong ia ki jingthmu bad ia ki nongrim jong ka Seng.
As a party, we take pride in welcoming Mr. Batskhmen Ryntathiang, MDC Mairang, Mr Carness Sohshang, MDC Mawkyrwat and Mr. Donevan Kharwanlang, Ex MDC Sohra in the NPP family.
We believe that the leaders will enable us to further the objective of our party and ensure that the… pic.twitter.com/blfi2JM9uA
— Conrad K Sangma (@SangmaConrad) February 19, 2024
Ula ong ba ka NPP kala ioh iaka jingkyrshan kaba pura ha kylleng ki bynta jong ka jylla bad kane kala paw shai kdar lyngba ka jingwan pyniasoh bun ngut ki nongialam bad ki nongkyrshan bad ula pynpaw ia ka jingkyrmen ba ka kyrtong jong ka seng ka Kong Ampareen Lyngdoh kaban iakhun ia ka elekshon MP Lok Sabha na Shillong constituency kan jop ia ka elekshon.
“Ngi la ioh pdiang ia ki jingtip na kylleng ki bynta jong ka rilum Khasi-Jaintia ba ka kyrtong ka jong ngi kala leh bha. Ngi dang don ia ka kam kaba khia kaba ngi hap ban leh bad da ka jingiatylli lang ngi hap ban trei shitom na ka bynta ka elekshon Lok Sabha” ong u Conrad.
Ula ong ruh ba ka sorkar NPP kala trei khlem shongthait ban kyntiew iaka ioh ka kot bad ia ka roi ka par jong ka jylla bad ula ong ba ka NPP kala pynkhreh iaka rukom treikam na ka bynta ban kyntiew ia ka jylla Meghalaya bad kumta kila trei ha kata ka rukom kaban iaid ryntih ban pynurlong ia katei ka thong.
“Ki jingkylla kiba ngi lah ban iohi bad ka roi ka par jong ka jylla kadei kaba ki paidbah ka jylla kila ioh ban sakhi. Nga ngeit skhem ba ki paidbah kin ai ka jingshaniah ha ka seng ha ka elekshon ban wan” ong u Conrad.
Katba u President ka NPP Meghalaya u Bah Prestone Tynsong ula ong ba ka NPP kala pynkhreh bha na ka bynta ka elekshon ban wan bad ka jingioh jingkyrshan na ki nongialam kan long kaba kongsan bha ha kaban wanrah iaka jingiadei kaba iajan bad ki paidbah ha kylleng ki shnong ki thaw.
