Shillong Rymphang 15: Ka seng sain pyrthei ka Khun Hynniewtrep National Awakening Movement (KHNAM) hynne ka sngi Palei kala pynlong iaka jingiashong kyllain mungor ha Shillong ban dawa pynduh pyndam noh ia ka Personal Interview ha ka jingthep kam ha ka kyrdan Group B, C bad D.
Ia kane ka jingiashong kyllain mungor la pynlong hakhmat jong u Mot Sahnam u Kiang Nangbah hajan Civil Hospital Shillong.
Ia kane ka jingiakhih la ialam da u Working President ka KHNAM Bah Thomas Passah bad u General Secretary u Bah James MA Neng ha kaba la wan ban iashimbynta bynta ruh da ki dkhot jong kane ka seng.
Ka KHNAM kala dawa ba dei ban pynduh pyndam noh ia ka Personal Interview kumba la leh da ka Sorkar India ha ka kyrdan Group B,C bad D kaba dei na ka bynta ka kam Cleaner, Sweeper, Lower Division Clerk, Driver bad kiwei kiwei.
Ka KHNAM kala pynpaw ruh ba ka jingdawa ban pynduh ia ka Personal Interview ka dei ruh ban khanglad ia ka jingthep kam ka bym khuid jong ki Myntri sorkar, ki MLA ia ki briew ki jongki ha kitei ki kyrdan.
