Amlarem, Rymphang 12 : Ka jingiatakhuh bad pyniksah hapdeng ki shipai Border Security Force (BSF) bad ki paidbah ha ka thain Amlarem kam dei shuh ka kam phylla bad dang hynnin ka sngi u Blei, la kynnoh ba ki shipai kila phah law ia ki jain phong jong uwei u nongtrei ka Animal Husbandry & Veterinary ryngkat ka byrngem byrsit ba kin siat iap ia u.
Kat kum ka jingong une u Nongtrei ka Veterinary, ki shipai BSF kila wan thombor ia u katba u dang leit khwai dohkha ha kawei ka wah ba marjan. U ong ba ki shipai BSF kila bat ia u bad sdang ban tohkit ryngkat ka jingpynibor.
Une u Rangbah u sei ia ka mobile phone bad sdang record video ia kane ka jingleh ki BSF, kaba la pynbitar shuh shuh ia ki shipai. Kumta ki BSF kila knieh jynthet ia ka mobile phpne bad bthah ia u ban law lut ia ki jain phong, haba byrngem ruh ban siat iap syndon ia u.
Ha ki video kiba la saphriang hapoh ki kor internet, une u Officer ka Veterinary ula ong ba arngut ki shipai BSF kila thombor ia u. Ula kam ba kine ki arngut kila hukum ia u ban dem khohsiew ha madan bad ban pan map na ki, ia kaba ula kyntait, kaba la pynlong ia ki shipai ban nang kiew jingdom haduh ban byrngem siat iap syndon ia u.
Ula iathuh ba don katto katne ki longkmie trai shnong kiba iohi ia kane ka jingjia bad kila wan mar mar ban tuklar, kaba lam sha ka jingiatim iatla kaba jur bha hapdeng ki trai shnong bad ki shipai.
