New Delhi, Rymphang 11 : U Myntri kam pohiing ka Ri Amit Shah ha ka sngi Saitjain ula pyntip ba ia ki kyndon (guidelines) ban pyntreikam ia ka Citizenship Amendment Act (CAA) yn sa pyllait noh shuwa jong ka elekshon Lok Sabha.
Ula ong ruh ba ka kam ban ai jingithuh kum ki nong India ia kiba ioh jingmyntoi, kan sa sdang noh shen tang mar syn dep pyllait ia ki kyndon.
Hapoh ka CAA, ka Sorkar u Modi ka thmu ban ai jingithuh kum ki nong India hapoh ka CAA ia ki poi wir ki bym dei ki Muslim ba shah leh bein, kiba kynthup ia ki Hindu, Sikh, Jain, Buddhist, Parsi, bad Khristan, kiba la wan poi sha India na Ri Bangladesh, Pakistan bad Afghanistan hapoh ka 31 tarik Nohprah, 2014.
Haba kren ha ka ET Now Global Business Summit 2024, u Amit Shah ula pynthikna ba ka Citizenship Amendment Act (CAA) ka dei ka lynti da ka ain ka ban sa pynbha ban pyntreikam hashuwa jong ka elekshon ban wan. Ula ban jur ba kam dei ban don ka jingsngewthuh bakla halor ka por ban pyntreikam ia ka CAA.
Ula ong, ka CAA kam dei kaba la pynwandur ban pynduh ia ka jinglong nongshongshnong iano iano ruh. Ula kren halor ki jingsngewkhia kaba iadei bad ka jingkynshoit hapdeng ki paid Muslim halor ka CAA da kaba ong ba kae ka Ain kam shym la kynthuh ia ki kyndon ban pynduh long Nongshongshnong.
U Amit Shah ula pynshai ba ka jingthmu jong ka CAA ka long ban ai long Nongshongshnong ia ki briew kiba shah thombor na ka jingpher niam bad kiba la poi wir na Bangladesh bad Pakistan. Ula kyntu ban nym pyrshah ia kane ka ain.
Naduh u 2020, ka Home Ministry kala pan por jan man ka por na ka Parliamentary Committee ha kaban thaw ia ka Rule ba iadei bad ka Citizenship Amendment Act (CAA).
Kaba sngewsih ba da ki spah ngut ki briew kila iap ha ka jingiakhih pyrshah na ka jingiatakhuh marmet bad ki Pulit hadien ba mynjur ka Parliament ia ka CAA.
