Ranchi, Nailar 01 :U nongialam ka seng Congress ha Jharkhand, u Rajesh Thakur u la ong ba ka jylla ka thain shatei lammihngi (Northeast) jong ka ri, ka Assam ha kine ki khyndiat por ba la lah ka la kylla long ka jaka bad ka tyllong na ka bynta ban pynkhyllem ia ki sorkar bym dei BJP hapoh ka ri.
“Ka BJP ka la bteng ban iasylla na ka bynta ban pynkhyllem ia ki sorkar jylla hapoh ka ri ha ka ba ia kine ki kam iasylla la pynlong na Assam,” ong u heh Congress ka Jharkhand.
Une u nongialam Congress ka Jharkhand u la ong ; “Baroh ki iohi kumno ba ka Assam ka la kylla long ka tyllong na ka bynta ban pynkhyllem ia ki sorkar, ka drama ka la jia haduh 15 sngi kynthih bad hadien ka sorkar Maharashtra ka la shah pynkhyllem noh…kane ka pyni ba ka la don ruh ka jingiasylla ban pynkhyllem ia ka sorkar Jharkhand. Kiei kiei kin sa paw shai ha kine ki sngi ki por ki ban wan.”
Kane ka jingkren u president ka Seng Congress ha Jharkhand ka la wan long ruh hadien ba u nongmihkhmat ka Congress na ka jylla u la kam ba laingut ki MLA ka party ki ba la shah kem ki la wan iakynduh ia u na ka bynta ban iakynduh ia u Myntri Rangbah (CM) ka Assam u Himanta Biswa Sarma ha Guwahati ban iakren na ka bynta ban pynkhyllem ia ka sorkar Jharkhand.
Lah ban kdew ba laingut ki MLA ka Congress na Jharkhand ki la shah kem noh ha ki bor pulit ka Bengal na Howrah hadien ba la kynnoh ba la ioh ruh ban kurup ia shibun bah ka pisa ha kane ka sngi Saitjain ba la lah.
Ha ka sngi U Blei ka ba bud, u MLA ka Congress na Jharkhand u la ujor pyrshah ia u CM Himanta Biswa Sarma halor ka jingioh kurup ia ka pisa ka ba da ki klur tyngka na ki laingut ki MLA ka party ha Bengal.
U MLA ka Congress na Bermo, u Kumar Jaimangal Singh ha katei ka jingujor pyrshah ia u CM Sarma hapoh Argora police station ha Ranchi ula kynnoh ba ki dkhot ki jong u ki ba la shah kem ha Bengal ki la kyntu ia u na ka bynta ban leit iakynduh ia u CM Sarma ha Guwahati ha ryngkat bad ki.
U Singh u la kynnoh ruh ba u la dei ban shah kular na ka bynta ban ioh bat ia ka shuki myntri nalor ka pisa ka ba da ki klur tyngka hadien ba ki la lah ban pynkhyllem ia ka sorkar synrop JMM-Congress hapoh Jharkhand.
Ha ka jingujor, u Singh u la kynnoh ruh ba u la shah kyntu ha kine ki MLA congrees ka Jharkhand ki ba la shah kem ban wan sha Kolkata bad ban ia leit ryngkat lang sha ka nongbah Guwahati ka Assam.
Nalor ka pisa ka ba mar T.10 klur na ka bynta uwei uwei u MLA, u nongmihkhmat na Jamtar u Irfan Ansari u la iathuh ruh ha u ba u la shah kular ban ioh ia ka kam Myntri ka tnat ka koit ka khiah ha ka sorkar thymmai jong ka BJP.
“U la pynthikna ha nga ba u Sarma un leh ia kane da ka jingkyrkhu jong ki nongialam ba halor ka BJP ki ba don ha Delhi,” ong shuh shuh u Singh ha ka shithi.
Hynrei, watla katta na ka liang u CM ka Assam u la kyntait halor kine ki jingkynnoh bad ong ba um don jingtip balei ba la ujor pyrshah ia u ha ka ba iadei bad kane ka phang.
