Shillong, Rymphang 4: Ka jingpynkhreh ka sorkar jylla ia ka Master Plan na ka bynta ka Administrative City ha New Shillong Township kala iaid bha shkhmat.
Ia kane la pyntip da u Symbud Myntri Rangbah ka jylla uba khnih ruh ia ka kam pynroi sor u Bah Sniawbhalang Dhar.
“Ngi lah rai ban pynkynriah noh ia ka Secretariat sha New Shillong Township. Kumta ka jingpynkhreh mynta ia ka Master Plan kala iaid bha shakhmat,” ong u Bah Dhar.
Ha u snem ba la dep, ka sorkar jylla kala tyrwa T. 200,00,00,000 na ka bynta ban pynkhreh ia ka master plan jong ka Administrative City ha New Shillong Township.
Ia katei ka jingtyrwa la wanrah lyngba ka Supplementary Demands for Grants and Supplementary Appropriation na ka bynta u snem 2023-2024 ia kaba la wanrah da u Myntri Rang ah ka jylla u Conrad K Sangma ha ka Dorbar Synrai kaba la long ha ka 16 tarik.u Nailur 2023.
“Ka jinglut jingsep kaba T.200,00,00,000 lyngba ka State Urban Infrastructure Development Initiative na ka bynta ban pynkhreh ia ka master plan jongka Administrative City ha New Shillong Township bad ban tei ia ka Administration Secretariat/Blocks laba thymmai ha New Shillong Township, Umsawli,” la pynpaw ka sorkar ha ka jingai jingthoh.
Ha ka 17 tarik u Kyllalyngkot 2023 ka kynhun myntri kala ai jingmynjur ban pynkynriah iaka administrative building jongka Sorkar jylla sha New Shillong Township.
Ka sorkar kala dep ban shim 807.7 akar ka jaka na ka bynta katei ka kam bad katkum ka jingpynpaw ka sorkar, ka jingpyntreikam ia katei ka rai kan iarap shibun ha kaban pynduna iaka jingdheng kali ha nongbah Shillong.
