Nongpoh, Rymphang 05: Ki paidbah nongleit nongwan ka Jylla Meghalaya – Assam sha Meghalaya bad kiwei kiwei ki jylla ki la mad ia ka jingsyrtok khait na ka jingdheng kali kaba la neh da ki kynta kynta na ka daw ka jingwan iuhkjat u Myntri Rangbah duh ka Ri u Narendra Modi ha Assam.
Kane ka jingdheng kali kala jir na ka jingpynlong ia ka jingialang paidbah ha ka madan kaba don markhap bad ka Khanapara.
Lah ban kdew, ba u Myntri Rangbah duh ka ri u Narendra Modi, u la wan iuhkjat ha ka jylla Assam ban shimbynta ha ka jingplie ia ki project kam pynroi kaba la kot da ki phew hajar klur tyngka bad ha ka jingialang la pynlong hapoh ka madan kaba don markhap bad u surok NH-6, Shillong Guwahati ba pyniasoh ia ka Meghalaya bad Assam.
La sakhi ruh, ba kane ka jingdheng kali kaba jur ka la jia ruh namar ka jingmih ki paidbah na ka jylla Assam kaba la kot da ki hajar hajar ngut, kiba la leit ban iashimbynta sha ka jingialang u Myntri Rangbah duh ka ri bad dei namar kane ka daw ka jingjur ka dheng kali ka la nang jur shuh shuh.
Kaba la ktah shikatdei eh ha kane ka dheng kali, ki dei kito ki riew paidbah kiba thmu ban leit shah sumar sha nongbah Guwahati bad ruh kito kiba thmu ban leit jingleit da ki liengsuin bad ka rel kiba ym lah shuh ban beh ia ka por ba la buh katkum ki jingleit ki jong ki.
Watla, ka jingdheng kali kaba la sdang naduh ka thain Jorabat terter shaduh Khanapara, la sakhi ruh ia ka jingbunkam ki bor pulit ka Assam bad na Khanapara Police Station ban pynbeit ia ka jingiaid jong ki kali kiba iaid ba ieng ha u surok NH-6, Guwahati Shillong.
