Shillong, Rymphang 04 : Ki Pulit bad ki Nongtrei ka Shillong Municipal Board (SMB) kim pat lapdien satia ia ka met jong u nongtam bilor bad mar jot, uba shah taplup ha ki niut mynta la palat 24 kynta ha Marten.
Ki nongwad ia ka met kila pynsangeh ia ka jingwad hynnin ka janmiet mar syn kem dum ka bneng kaba lah ban buh jingma pynban ia ki, bad hynne ka step kila sdang biang ia ka jingwad da ka jingkyrmen ba kin lap noh.
Uwei u nongtam bilor ba kyrteng u Marshal Marwein ba 30 snem ka rta, ula shah taplup ha ki niut hynnin ka step sngi Saitjain, kaba la jia na ka jingtwa kynsan u niut ba nalor lum sha ka jaka them ba u don. Kane kala jia hynnin ka step por 8:30 baje eiei.
Ki Pulit ki iathuh ba kawei kaba buh jingeh ia ki nongiawad ia ka met, ka dei namar ka jingdon jong ki niut kiba la thang ha kane ka jaka bad ba ka ding kaba dang pur sha ki niut ba shapoh.
Ki Pulit ba wat hynnin ka sngi ruh ki niut ki dang ing beit na ki bynta ba shapoh ia kaba la sakhi na ka jingmih jong ka tdem ha sawdong jong kane ka jaka bret niut.
