Shillong, Rymphang 03: Uwei u samla rangbah uba ju im da kaba tam bilor plastic bad mar jot ha Marten, la suba ba ula shah tep im hynne ka step sngi Saitjain, ha u niut uba twa nalor lum.
Une u samla rangbah u kyrteng u Marshal Marwein ba 30 snem eiei ka rta bad haduh mynta, ki bor pyniaid jong ka Marten, ki dang iawad ia une u briew ha kane ka jaka theh niut jong ka Nongbah Shillong.
Kat kum ka jingiathuh ki nongtam mar jot, u Marshal ula hiar sha ka jaka ba long them ban tam ia ki bilor pastic bad ki tin jot wat hapdeng ka jingmaham jong ki para nongtam mar jot, ba ka jaka ba u leit tam marjot ka dei kaba shong synjor bad ba dang shu twa shen.
Ki iathuh ba u Marshal u khlem pynsngap satia ia kane ka jingmaham bad kumta hi, u niut ula twa bad ula tap lup syndon ia u shapoh u niut.
Ki iathuh ba mar syn jia kane ka jingjia, mar mar kila leit pyntip sha ki nongkhmih ia ka marten hynrei la kynnoh ba kine ki nongtrei kim shym la leh eiei satia mar dor bad ap haduh 2 kynta tam ban sdang wad ia u briew.
Ka FKJGP Shillong City haba ioh jingtip ia kaei kaba jia, kala hiar mar mar sha Marten ban iarap wad lem ia une u rangbah bad ban pynthikna ba ki nongtrei ka Marten kin shimkhia ban wad ia une u briew haduh da shem.
Na ka liang ki Pulit ka Mawlai Police Station ruh kila phah wut wut ia ki briew sha Marten ban iarap wad lem ia une u rangbah.
