Pynjlan ka Sorkar sa 6 bnai ia ka samoi treikam ka KHADC bad JHADC

Shillong, K’lyngkot 02 : Ka Sorkar Jylla ha ka sngi Thohdieng, kala mynjur ia ka jingtyrwa ban pynjlan ia ka samoi treikam jong ka Khasi Hills Autonomous District Council (KHADC) bad Jaintia Hills Autonomous District Council (JHADC) sha hynriew bnai.

Ka samoi treikam jong kine ki artylli ki District Council kan kut noh ha ka 4 tarik Lber, 2024. Ka jingpynjlan kan sdang naduh ka 5 tarik Lber ka ban long hynriew bnai kynthih.

Ka daw ba pynjlan ia ka elekshon jied Nongmihkhmat thymmai jong kine ki Council ka dei namar ba kine ki Council kila kyrpad ban nang pynjlan ia ka jingaipor ia ki Delimitation Committee.

U Lat ka Jylla ha u snem bala lah, ula aibor ia kine ki Council ba kin thung ia ka Delimitation Committee ki ban pynbeit ryntih ia ki MDC constituency jong baroh artylli ki council kat kum ka jingdon ki nongshongshnong bad kiwei kiwei.

“Dang shen ki artylli ki Council kila phah ia ka jingtyrwa sha ka Sorkar Jylla ban pynjlan shuwa ia ka jingtreikam jong ki Delimitation Committee” ong u Bah Prestone Tynsong Symbud Myntri Rangbah ba khmih ia ka District Council Affairs ka Jylla.

Kane ka rai ka mut ruh ba ia ka elekshon MDC jong ka KHADC bad JHADC la pynjlan sa hynriew bnai.

Hynrei ia kane ka rai jong ka Sorkar yn sa phah sha u Lat ka Jylla ba un ai jingmynjur.

U Bah Prestone ula iathuh, ba ki Delimitation Committee kila pan por na ki District Council ka KHADC bad JHADC, kumta ka EC kala phah ia ka jingtyrwa ba pan por ban pynjlan sa 6 bnai.

U iathuh ba ki Public hearing jong ki Delimitation Committee ki dang iaid mynta ha ki artylli ki ADC constituency.

U DyCM u iathuh ba hadien katto katne bnai, ka Sorkar kan sa bthah ia ki artylli ki ADC ba kin aiti ia ka kaiphod jong ka jingphiah constituency bad hadien kata, yn sa pynbeit ia ka elekshon.