Shillong, K’lyngkot 31 : U Myntri Rangbah ka Jylla ha ka sngi Balang ula ong ba ka rai ban pynlong kloi ia ka Dorbar Mang Tyngka jong ka Iingdorbar Thaw Ain ka Jylla ka dei namar ka elekshon Lok Sabha ban wan.
Haba iakren bad ki nongthoh khubor, u Conrad ula ong ba ka Jylla kan ym lah ban ai jingmynjur ia ka Mang Tyngka ba pura lada la pynbna noh ia ka elekshon.
“Lada pynbna ia ka elekshon, ngi hap pynlong da ka Vote on Account, kaba mut ba kan sa pynthut ia ka rukom pynlut jong ka Jylla ha kane ka snem mang tyngka ban wan bad kumta ban kiar na kata, ngi la khot kloi ia ka Dorbar Mang tyngka khnang ba ngin lah ban mynjur ia ka mang tyngka ba pura” ula ong.
Ka Dorbar Mang tyngka jong ka Iingdorbar Thaw Ain ka Jylla kan sdang naduh ka 16 tarik u Rymphang.
