Shillong, Kyllalyngkot 31: Ka kynhun ki President jong ka BJP Mahila Morcha na Meghalaya, Sikkim, Nagaland bad kiwei kiwei ki jylla jong ka thain Shatei Lam Mihngi, kala leit iakynduh iaka Kong Silbi Passah ha ka iingsah halor ka jingpynbna ba kan ioh pdiang ia ka khusnam Padmashree.
Ha katei ka jingleit iakynduh la iadonlang u Nongaiktien ka BJP Meghalaya Bah Mariahom Khrakrang bad u Vice President u Gagan Jain.
Kane ka jingai jingithuh ia ka Kong Passah ka long kaba shong nongrim bha bad ka long ruh ka jingkynthup lang iaka thup jong ki riewpawkhmat kiba iadei bad ka jingtem bad jingrwai tynrai ha ka jylla.
La bun snem kane ka longkmie kala iaid bha ha katei ka bynta bad kala ioh pdiang ruh iaki khusnam kum ka Sangeet Natak Akademi, Indian Chamber of Commerce for Affirmative Action Front-Liners Award, na ka Prasar Bharati, ka Meghalaya Day Award bad kiwei kiwei.
Haba kren ha ka jingialang u Bah Mariahom Kharkrang ula ong ba la bun phew snem ka Kong Passah kala pynshohbiej ia ki paidbah lyngba ki jingrwai tynrai kiba kit jingmut bha, hynrei tang ka sorkar pdeng hapoh ka jingialam u Myntri Rangbahduh ka ri u Narendra Modi ula ai jingithuh ia ka jingnoh synniang kaba shonghok ban ioh iaka Padmashree ia kaba kala dei ban ioh la slem bha. Kane ka jingai jingithuh kan iai kyntiew iaka jingriewspah ha ka tem ka pur tynrai haka ri baroh kawei bad kadei ruh kaba pyni ba dei tang ka Sorkar BJP kaba lah ban ai ia ka Meghalaya ia kaba kadei ban ioh.
Katba ka Meghalaya BJP Mahila Morcha President ka Kong Susuki Pariat kala ong ba ka “Kong Sylbi Passah kala wanrah nam bad burom iaka thain shatei lamihngi baroh kawei.
Nga ai khublei ia ka sorkar u Modi kaba la ai jingithuh iaka jingtrei shitom jong ka kynthei Riewlum na Meghalaya da kaba ithuh ia ka jingnoh synniang ka jong ka ha ka imlang sahlang. Hato kiwei pat ki sorkar kin ai jingithuh ia ka ban ioh iaka khusnam Padmashree, nga lyngngoh bha. Kane ka jingleh ka sorkar u Modi ka long ka sakhi kaba shai kdar ia ka jingiehskhem halor ka ‘sabka saath, sabka vikaas, sabka biswas’, da kaba shimlang ia baroh, wanrah iaka roi ka par naka bynta baroh bad ban ioh ia ka jingshaniah na baroh”.
