U samla Badondor Marbaniang u hero ba pynjop ia ka Meghalaya
Shillong, K’lyngkot 31 : Ka kynhun phutbol ka Meghalaya kala ioh rah ia ka nam kum ka Champion jong ka Khelo India Youth Games, 2023 da ka jinglah pynliem ia ka Punjab ha ka jingiakhun phainal ba long hynne ka sngi Balang ha Chennai.
Ka kynhun ialehkai ka Meghalaya kala pynliem da 2-0 kol ia ka Punjab. Ka Meghalaya kala bat ruh ia ka nam kum ka kynhun kaba khlem shah rem satia wat shisien ruh naduh ka jingiakhun jong ka group stage haduh ban da ioh rah ia ka nam lahduh.
Ha ka jingiakhun, u samla Badondor Marbaniang ula long u hero jong ka kynhun ialehkai ka Meghalaya lyngba ka jingioh thep ia baroh artylli ki kol ban ioh rah ia ka nam Champion. U Captain Colinsalmon Lyngdoh ula shim ia ka bynta kaba kongsan bha ban pynlong ia ka kynhun kaba khlain duh ha shilynter jong ka lympung ialehkai.
Ka Meghalaya kaba don ha ka Group A ha ryngkat ka Punjab, Tamil Nadu bad Uttar Pradesh, kala pynliem lut ia kine ki kynhun ban wan hakhlieh duh jong ka group bad ban rung sha ka semi phainal.
Ha ka jingiakhun jong ka Group Stage, ka Meghalaya kala pynliem ia ka Uttar Pradesh da 4-1 kol, ia ka Punjab da 2-1 kol bad ia ka Tamil Nadu da 2-1 kol.
Ha ka jingiakhun jong ka semi phainal, ka Meghalaya kala pynliem ia ka Jharkhand da 5-3 kol bad u samla Mebanlamlynti Marsharing u dei u khlur jong ka jingiakhun da ka jingioh thep hat trick bad pynskhem ruh ia u kum ka nongthep kol ba bun tam ka Meghalaya, uba la ioh haduh 7 kol ha kane ka lympung.
Halor kane ka jingjop jong ka kynhun, u Myntri Rangbah ka Jylla Conrad K Sangma ula pynpaw ia ka jingkmen bad ong “Ka jingjop ym tang ka wanrah ia ka jingsarong ia ka Meghalaya hynrei ka pyni ruh ia ka jingdon kyrhai ka sap bad ka jingaiti jong ki samla ha ka kam ialehkai.
“Khublei ia ka kynhun Meghalaya halor ka jinglah ialehkai bha bad ban wanrah sha iing ia ka Khelo India Youth Games Championship 2023. Kane ka jingjop ka dei ka sakhi ia ka mynsiem long nongialehkai bad ka jingtrei shitom kaba batai shaphang ka Jylla jong ngi” ula ong.
Haba kren shabar ka madan ialehkai, u Myntri kam ialehkai ka Jylla Bah Shakliar Warjri ula ong “Ka jingjop jong ka kynhun ialehkai phutbol ka Meghalaya ha ka Khelo India Youth Games 2023 ka dei ka sakhi ia ka jingkut jingmut kaba skhem jong ka Sorkar ha ka jingkynshew bad jingtei ia ki madan ialehkai ha Jylla.
Haba ai jingithuh ia ka jingialehkai bha ki rang ialehkai, ka burom ka leit ruh sha ki Coaching Staff bala ialam da u Head Coach bad CDM Jeffrey Warlarpih. Ka jingiatrei shitom lang jong u Coach Beneslaus Khyriem bad Manager Andy Lyngdoh Nongpiur ka dei ka bynta ba kongsan bha ha kaban pynwandur ia kane ka lynti iaid jong ka Meghalaya sha ka jingjop.
