Nongpoh, K’Lyngkot 31: Ka lympung ïalehkai phutbol bala tip kum ka Night Football Knock-Out Tournament bala pynïaid da ka Tbeh Jingshai Umroi Football Association kala sdang hynnin ka miet ha madan Umroi hapdeng ka jingshongkun bad shongshit kaba dei ruh ka sien ba nyngkong bala pynlong ïaka jinglehkai phutbol haka por mynmiet.
Ïa katei ka lympung ïalehkai phutbol la wan ban plie pyrda da u Bah Damanbait Lamare MLA ka Umroi kum u kongsan, haka jingdonlang u Bah Shalan Sylliang President ka TJUFA, Lover Roy Lyngdoh Secretary, Bah PB Sylliang Rangbah Shnong Umroi Umdohbyrthih bad kiwei kiwei ki riew rangbah.
Ka jingïalehkai plie pyrda ha katei ka sngi kala long hapdeng ka Bhoi Zone pyrshah ïaka Clarissa ha kaba ka jingïalehkai ka long kaba shongshit bad itynnad bala wan ban sakhi ruh da ki spah ngut ki paidbah watla ka dei haka por mynmiet ban ai jingkyrshan ïala ka jong ka kynhun bad hapdeng ka jingïakhun kaba jur naduh ba sdang ka kylla step haduh ka kylla miet ka Bhoi Zone kala lah ban pynliem noh ïaka Clarissa da 2-0 kol ban rah ïaka jingjop ba nyngkong jong katei ka lympung.
