Shillong, K’lyngkot 30 : U Myntri Rangbah ka Jylla Conrad K Sangma, hynne ka sngi Ba-ar, ula plie paidbah ia ka Mawrah Multi-Purpose Water Reservoir (dam pyllang um) haba pynbna ba ka Sorkar kan kynshew kumba T. 400 klur ban shna ia ki dam um ha kylleng ka Jylla ha kine ki lai snem ban wan.
Ia kane ka dam pyllang um la plie ha ka jingialang kaba long ha Mawrah ha ka jingiadonlang ka Myntri ka Koit ka Khiah Kong Ampareen Lyngdoh, u Myntri ka Tnad PHE Marcuise M Marak, u MLA ka Sohra Bah Gavin Mylliem bad kiwei kiwei.
Inaugurated the Mawrah Multipurpose Water Reservoir under the Sohra Civil Subdivision. In just 2 years, with community support and commendable efforts by the Soil & Water Conservation Department, the area is now transformed to a beautiful water body which was revived from a… pic.twitter.com/G1Lr2bdgwC
— Conrad K Sangma (@SangmaConrad) January 30, 2024
Haba ai jingkren, u Myntri Rangbah ula ong ba ka jingiada bad pynneh pynsah ia ki tyllong um bad ka jingshna ia ki dam pyllang um ka dei kawei na ki mat treikam ba kongsan bha bala buh da ka Sorkar Jylla.
“Ngin sa kynshew pisa kumba T. 400 klur ha kine ki lai snem ban shna ia ki dam pyllang um ha kylleng ka Jylla” ula ong.
U Conrad u pyntip ba kumba 4-5% ka um slap ka dei kaba neh hapoh ka Jylla bad kaba tam kala tuid ei sha ka Jylla ba marjan bad ka Ri ba marjan bad kumta ka jingshna ia ki dam pyllang um ka dei tang ka lynti ban lah pyllang ia ka umslap.
U Myntri Rangbah ula ong ba ka Mawrah Multi-Purpose Water Reservoir kan shakri kum ka project ia ki kam bapher bapher ka ban kyntiew ia ka kam jngohkai, ka kam ri dohkha bad ka rep ka riang. Ula ong pyntip ba yn sa siang rong noh ruh ia ka surok ba 25 Km na Sohra main raid sha Khongtong hapoh ka skhim PMGSY bad la khmih lynti ba kane ka kam kan dei hapoh u bnai Kyllalyngkot 2025.
“Kane ka surok kan long ka jingkyrkhu ym tang ia ki paidbah ka thain hynrei kan kyntiew bha ruh ia ka kam sawari” ula ong.
Ka Mawrah Multi-Purpose Water Reservoir project, ka dei kaba la sdang ia ka survey bad pynkhreh ia ka project naduh u Iaiong 2021 ha ka jingmang tyngka ba T. 1.50 klur lyngba ka NABARD-RIDF jong u snem 2021-2022.
Hadien, kiwei pat ki jingiarap pisa kila wan na ka State Plan bad ka Meghalayan Age Ltd ban tei ia ka lynti iaid kjat halor ka dam, ka rynsan shong lieng bad kiwei kiwei ki jingtei.
Kumba long mynta, kang ka dam pyllang um kala kylla long ka jaka shong jaka sah jong ki jait dohkha bapher bapher bad kala khring ruh ia ki sim kiba krih na kawei ka jaka sha kawei pat.
