Nongpoh, K’lyngkot 30: Ka HYC Ri Bhoi District hynne ka sngi Ba-ar, ki la beh krad ia bun ngut ki samla kynthei bad shynrang kiba la pynlong kum ka jaka dih kyiad bad dih sikret ha ka surok Killing hajan ka skulbah USTM, Ri Bhoi District.
Ka HYC Ri Bhoi District hapoh ka jingïalam u General Secretary samla Tonny Shylla ryngkat ki dkhot ki la hiar sha katei ka jaka hadien ka jingujor na ki paidbah ba ki samla pule na USTM kynthei bad shynrang ki ju leit ban pynlong kum ka jaka dih kyiad bad ka jaka dih sikret ha katei ka surok kaba don hajan ka skulbah.
Ha kane ka jingleit jurip, ka seng ka la lap shisha ba ki samla kynthei bad shynrang ki wan ha katei ka jaka ban pynlong kum ka jaka dih kyiad bad dih sikret, ha kaba ha kane ka sngi ki la beh krad ïa kitei ki samla ryngkat ki jingmaham ba kim bit ban pynlong ïa katei ka jaka kum ka jaka leh sngewbha kaba ktah ïa ka akor ka burom ka thain.
Haba kren sha ki Nongthoh Khubor, u samla Tonny Shylla, u la ong ba kum ka seng kam lah ban pdiang ïa ki jingleh khlemakor kitei ki samla kiba ïa dih kyiad bad dih sikret ha lynti paidbah bad kam lah ruh ban tip ïoh ka dei ka jaka dih drok kaba ktah ïa ka imlang ka sahlang.
U la ong ruh ka seng ka kala iohpdiang ia ka jingujor na ki nongshong shnong ka thaiñ kiba la ju ud juh nam ïa kine ki kam khlem akor jong kitei ki samla.
Ha kajuh ka por, une u Nongialam ka HYC u la kyrpad ïa ki nongïalam Shnong, ki seng longkmie, ki samla bad ruh wat ki bor pulit ba ki dei ban pynlong ïa ka jingkhynra na ka por sha ka por ha katei ka jaka khnang ba khanglad ia kum kine ki kam kiba pynjah burom ïa ka imlang ka sahlang bad kaba long ka nuksa ba sniew ïa ki heprit.
