Shillong, K’lyngkot 28 : Uwei u samla 23 snem ka rta, ula hap hapoh ka riat bah riat san jong ka thain Mawmluh, Sohra ha ka jingialeit kai sngewbha bad uwei u paralok hynne ka janmiet sngi U Blei.
Kat kum ka khubor Pulit, une u samla u kyrteng u Bankynmaw Lyngdoh Mairang uba shong ba sah ha Nongmensong bad uba trei hapoh ka Pala Resort.
Ki Pulit ki iathuh ba une u samla ula leitkai bad uwei u paralok da ka thuk thuk sha kane ka jaka jngohkai bala tip kum ka 100 Waterfalls Camping site.
Ki iathuh ba une u samla ula hap shapoh kane ka riat ha ka por ba u dang leit pynjhieh. Ia kane ka jingjia la pyntip mar mar sha ki Pulit da ki briew kiba iadon ha kane ka jaka jngohkai.
Ki Pulit kila poi sha kane ka jaka mynta bad ki dang pynkhreh ia ki tum ki tam ban hiar shapoh kane ka riat bad ban sei ia ka met jong une u samla.
Ia ka khubor ba kham bniah yn sa ai kham shibit.
