Shillong, K’lyngkot 22 : Ka Bharatiya Janata Party (BJP)-Meghalaya, kala dawa ia ka Sorkar Jylla ba kan pynbeit mardor ia ka jingrwai State Anthem da kaba pynrung lang ia ka ktien Pnar ha ka jingrwai.
Ka BJP Meghalaya kala pynpaw ia ka jingbym sngew iahap ba la shu ieh ia ka kten Pnar ha ka jingrwai State Anthem, kaba la pyllait paidbah kum shibynta jong ka jingrakhe ia ka Meghalaya Day ba 52.
Kat kum ka jingong ka party, kito kiba la iohsngew ia ka anthem lane pule ia ki kyntien kin tip ba ka ktien Pnar kala jah katba la pyndonkam tang ia ka ktien Khasi bad Garo ha ryngkat ka ktien phareng.
Ka party ka ong ruh ba ha ka jingialang jong ka kynhun Myntri bala iashong ban ai jingmynjur khatduh ia ki kyntien jong ka jingrwai, u dkhot ba marwei ka BJP hapoh ka kynhun Myntri Bah A.L.Hek, ula ieng skhem ha ka nongrim ba ym pat dei ban pyllait paidbah ia ka state Anthem khlem da pyndonkam lang ia ka ktien Pnar bad ba u nongthaw ia ka jingrwai u dei ban thoh biang sa shisien ia ka jingrwai.
Hynrei, ia kane ka jingpyrshah bad jingai jingmut la shu khein dewthala da kiwei pat ki dkhot kiba don ha ka jingialang.
U Nongaiktien ka BJP Bad Mariahom Kharkrang ula ong “Ka long kaba sngewsih ba kawei ka Ktien ba kren bun eh ha Jylla, kala shah ieh shadien. Ngim tip shuh ba ka dei ka jinglehkhnang ne ba shu jia ryngkhat. Hynrei kaei kaba ngi tip, ka long ba dei ban bynrap biang ia ki kyntien bad ka dei ban long ka ktien Pnar”.
“Ngi dawa ban pynbeit noh mar mar khnang ba baroh ki ktien jong ki lai jaidbynriew ba hehpaid ka Jylla kan donlang bad ban nym pynmong iano iano ruh. Ki Khasi, Jaintia bad Garo kila iatylli kawei ban pynlong ia ka Jylla” ula ong.
