Shillong, K’Lyngkot 17: Ka kynhun ki nongialam ka Riwar Mihngi ha ryngkat ki sengbhalang ba kynthup ka Hynniewtrep Achik National Movement (HANM) bad Federation of Riwar Mihngi Local Dorbar hynne ka sngi Balang, kila leit ban rah placard bad pyrta ki kyntien pynrem hakhmat ka ophis treikam ka NHIDCL kaba don ha Barik Shillong.
Kane ka jingtur paidbah ka dei halor ka nongrim ban dawa na ka Sorkar Jylla bad NHIDCL ba kin maramot noh iaka surokbah Shillong-Pynursla-Dawki Road.
Haki placard la pynpaw da ki jingthoh ba pule ‘Kiew dor bai kali, kiew dor ki mata dei namar ba sniew palat ka surok’, ‘3 snem ngi la mad iaka jingsniew ka surok, sa katno snem ngin dang iai ap bad mad iaka jingsyrto’, ‘Ngi dawa na u MLA ka thain ba un pyni daka kam’ bad kiwei kiwei de.
Hadien ka jingieng bad pyrta pynrem iaka NHICL bad iaka Sorkar Jylla, u General Manager ka NHIDCL ula khot iaki nongialam ban iakren hapoh ka kamra treikam.
Haba kren sha ki lad pathai khubor hadien ka jingialang, u Bah Edmund Khongngai ula iathuh baka JAC kala aipor 20 sngi iaka Sorkar Jylla bad iaka NHIDCL ban maramot iaka surok bah Shillong-Pynursla-Dawki bad lada kim lah ka JAC kan ujor da ka PIL hapoh Meghalaya High Court.
“Ka thain Riwar kala mad ia ka jingeh naka daw ka jingsniew palat ka surok mynta la 3 snem tam bad lada ka Sorkar Jylla bad iaka NHIDCL kim lah ban maramot hapoh ka 20 sngi, ka JAC kan leit ujor daka PIL shaka Meghalaya High Court” la ong u Bah Edmund.
U Bah Edmund ula dawa ruh na u Symbud Myntri Rangbah ka Jylla u Bah Ptestone Tynsong uba dei ruh u MLA ka Pynursla Constituency ban shim ka jingkitkhlieh ban pynbha iaka surok naka bynta ka bha ka miat ki nong shong shnong ka Constituency.
” U Bah Ptestone Tynsong udei ruh u Myntri ba khmih iaka tnat PWD bad lada um lah ban leh eiei ban maramot ia kane ka surok, uddi ban hiar shuki noh kum u Myntri Sorkar” la ong u Bah Edmund.
