Imphal, K’lyngkot 17 : Ka jingiather kuli kaba shyrkhei kala khie biang hapdeng ki bor pahara bad ki kynhun kaikhlaw Kuki hynne ka step sngi Balang ha Moreh, Tengnoupal District bad ha kane ka jingjia, uwei u Pulit Commando ula kyllon iap hashen.
Kat kum ka kaiphod, ki suba kaikhlaw Kuki kila kawang bomb bad siat naphang ia ka jaka shong jong ki bor pahara ha SBI Moreh. Ki bor pahara kila iakhun bad pynphai kylla bad mih ka jingiather kuli kaba shyrkhei.
Une u Pulit ba kyllon iap u kyrteng u W Somorjit katba uwei pat u pulit commando ula mynsaw jur.
Ka jingiather kuli kala neh haduh shikynta tam. Kane ka jingjia kala jia biang tang hadien arsngi ba sahh kem ki arngut ki briew halor ka jingsuba ba ki pyniap ia uwei u heh Pulit ha Moreh.
Halor ka jingnang ishyrkhei ka jinglong jingman, ka Sorkar Manipur kala pynjari da ka korphiw ba pura hapoh ka District namar ka jingthut ka shongsuk shongsain kaba buh ha ka jingma ia ki mynsiem briew bad ki nongkynti.
Kat kum ka khubor la iathuh ba wat hapdeng ka jingiather kuli bad ka jingpynjari ia ka korphiw, ki nongshongshnong ka Moreh kila iamih beit sha surok ban pynpaw ia ka jingpyrshah halor ka jingkem ia ki arngut ki samla ka thain, ia kiba la suba donkti ban siat iap ia u Pulit Ophisar.
