Shillong, K’Lyngkot 13: Ka Hynniewtrep Youth Council (HYC) bad ka NEHU Student Union (NEHUSU) hynne ka sngi kala pynbna ban weng noh iaka jingiakhih kaba la pynbeit ban pynlong haka 15 tarik mynta u bnai.
Lah ban kdew baka HYC bad ka NEHUSU kala pynbeit ban pynlong daka jingiakhih daka ba iaid paidbah na Motphran shaduh Secretariat hadien ka jingslem ka Sorkar Jylla ban pyllait iaka Scholarship ki samla pule.
Ka jingweng noh ia Kane ka jingiakhih kadei namar ka Sorkar Pdeng kala pyllait T.41.25 klur shaka Meghalaya naka bynta ban pyllait iaka Post Matric Scholarship 2022-2023.
Haba kren ha kane ka sngi u Secretary ka Education Cell ka HYC, u samla Enlang Sawiang ula ong ba ki samla pule kila weng iaka jingiakhih hynrei ki ai por artaiew iaka Sorkar Jylla ban pynpoi iaka pisa shaki Bank Account ki samla pule kiba dei ban ioh iaka Scholarship.
“Watla, ngi la pynbna ban weng noh iaka jingiakhih hynrei ka Sorkar Jylla kadei ban pynthikna ba ka pisa kan poi sha ki Bank Account jong ki samla pule hapoh artaiew” la ong u samla Enlang.
U samla Enlang ula kyntu ruh iaka Sorkar Jylla ban shim ka jingkitkhlieh ban pynthikna ba nangne shakhmat, ka Scholarship ki samla pule ka Jylla kam dei shuh ban slem, kum mynta ka kynti.
Ula dawa ruh naka Sorkar Jylla khamtam na u Myntri ka tnat pule puthi ban iakren bad ka President ka Ri India ka Droupadi Murmu halor ka jingdonkam ban kyntiew iaka pule hapoh ka skulbah NEHU.
