Nongpoh, K’lyngkot 12: Ka Sorkar Jylla kala thaw mynta da ka Committee ka ban pyntreikam ia ka National Clean Air Programme (NCAP) ha Byrnihat.
Ia kane ka committee la khlieh da u Deputy Commissioner kum u Chairman. Ka jingthung ia kane ka Committee kala urlong hadien ka jingioh record ka Byrnihat kum ka jaka sor ba jaboh tam ka lyer ring mynsiem ha Ri India, kat kum ka kaiphod jong ka Centre for Research on Energy and Clean Air (CREA).
Ka Sorkar lyngba ka jingpynbna (Notification) No. Env.2/2018/436 Dtd. 07/09/2021 ba thung ia ka Committee, kala bthah ia u committee ba kan pyntreikam ia ki action plan bala dep mynjur na ka bynta ka Byrnihat. Ka action plan ka kynthup ia ka jingpyniadon bynta lem ia ki kynhun/ Tnad treikam bapher bapher ba kin trei/leh ia ki kam bala buh ha ka action plan khnang ban tehlakam ia ka jingpynjaboh ia ka lyer ha Byrnihat.
Hapoh ka NCAP, la dep ban pyntrei ia bun ki kam ha kaban pynduna ia ka jingpynjaboh ia ka lyer ha Byrnihat bad kine ki kynthup ia ka jingpynbha ïa ki surok ha ka thaiñ EPIP ba bun ki Karkhana, ban thungdieng ha ki jaka ba suda bad ban pynmih khlaw, ban pynheh ia ka Air Quality Monitoring Station, ban ialap paidbah, ban talasi bad pynthikna ba ki petrol pump kim dei ban khleh jingkhleh ha ki petrol/diesel bad kiwei kiwei.
Haba phai sha ka Meghalaya State Pollution Control Board (MSPCB), la ong ba ka board ka ju khmih bad peit pyrman ia ka jingpynmih tdem jong ki karkhana lyngba ki Air Control Monitoring Station kiba don ha ki 4 jaka ha EPIP.
Lah ban kdew b aka MSPCB kala thung ia ka Center for Science & Industrial Research-National Environmental Engineering Research Institute (CSIR-NEERI) ba kan leh ia ka Environmental Carrying Capacity (AIR) jong ka Byrnihat.
