Shillong, K’lyngkot 12 : Ka Sorkar India kala pyllait ia ka instalment kaba ar jong ka Post Matric Scholarship ba kot T. 41 klur tam, ban sam sha ki samla pule Scheduled Tribe ka Jylla Meghalaya na ka bynta u snem 2022-2023.
Ia ka order ban mang bad pyllait ia kane ka grant-in-aid ban ai scholarship, la pyllait hynne ka sngi Thohdieng ka 12 tarik Kyllalyngkot 2024 da ka Ministry of Tribal Affairs (Scholarship Division).
Ka shithi, ka copy bala ioh da ka Shlem, ka dei kaba la phah sha ka Pay & Account Officer jong ka Ministry of Tribal Affairs.
Ka song pisa bala pyllait baroh ka long T. 41,25,00,000.
Hynrei, la sngewthuh ba kane ka pisa kam pat poi satia sha ka Account jong ka Sorkar Meghalaya, kaba lah ban shimpor sa katto katne sngi. Hynrei da kane ka jingpyllait ia ka pisa, ka shong satang katto katne sngi ba ki samla pule kin ioh pdiang ia ka pisa ha ki bank account jong ki.
Hadien ka jingioh pdiang ia ka shithi na ka Sorkar Pdeng bala pyllait ia ka song pisa, u Myntri ka Tnad Pule Puthi Rakkam A Sangma ula ong ba ka Sorkar kan pyrshang ban pyniaid wut wut ia ki kam khnang ba ki samla pule kin ioh noh ia ka pisa scholarship ha ka taiew ban wan.
U Myntri ula ban jur ruh ba ka Sorkar Jylla kala kut jingmut ban weng ia baroh ki jingeh jong ki samla pule bad ban iai tynruh ia ka Sorkar Pdeng na ka bynta ka jong ki. Ula kyrpad ia ki samla pule ba kin pyndonkam bha ia ka scholarship.
