Shillong, Kyllalyngkot 11: Ka Khasi Students’ Union (KSU) lyngba ka Employment Monitoring Cell, kala leit ai da ka dorkhas sha u Director (Corporate Affairs) jong ka MeECL halor ka jingpynslem ban thung ia ka kam Assistant Engineer (Electrical/ Mechanical).
U Chairman ka Cell samla Reuben Najiar bad u Secretary u samla Manly Nongpliuh, kila pynpaw ba ia ka post jong u Assistant Engineer (Electrical/Mechanical) la pyndep ia ka jingthoh eksamin (written examination) ha ka 13 tarik Naitung, 2019 bad la pynmih ia ka Result ha ka 19 tarik u Nailar, 2019 ha kaba la jied ia 24 ngut ki ban hap leh ia ka (personal interview) ha 26 tarik u Nailur, 2019.
Kila pyntip ba hashuwa kata ha u 22 tarik u Nailur 2019 kila pynpep noh ia kane ka interview bad la 4 snem tam kim shym la lah shuh ban pynurlong ia kane ka kam.
“Ka Seng haba iakren bad ki bor pyniaid jong ka MeECL kala ioh jingtip ba ka MeECL kam shym la lah ban thung kam iano iano ruh naduh u snem 2020 namar bym don pisa ban siew tulop bad ia ki post ba kyrkieh ba donkam la shu thung da ka kontrak ne Contractual Basis” la pynpaw ki nongialam ka Employment Monitoring Cell.
Ka Seng ka buh dak jingkylli ia ka Sorkar jylla, khamtam eh ia ka Power Department ba kaei ka sienjam ba kala shim ban pynbeit ia ki kynrum kynram ha MeECL bad kumba ka long mynta kaei ka lawei jong ka MeECL.
“Ka Seng ka dawa na ka Sorkar jylla ba kadei ban shimkhia halor ka thungkam thungjam ha ka MeECL bad kumjuh ruh ban pyllait ia ka tulop jong ki nongtrei ka MeECL, namar mar ia mih na ka jingiakren, kila wan ki nongtrei MeECL ban pynsngew sha ka Seng halor ka jingbym pat pynlait ia ka tulop ka jong ki” la pynkut ki nongialam ka KSU.
