Shillong, K’lyngkot 10: “Lada ka Sorkar Meghalaya Democratic Alliance (MDA) ka khlem treikam, kumno ki briew ki dang jied ia u Conrad K Sangma kum u Myntri Rangbah ka Jylla bad iaka Party kaba u ialam ban thaw Sorkar haka ba arsien”.
Ia kane la ong da u Myntri ka tnat PHE u Marcuise N Marak haba iadei bad ka jingkynnoh u President ka Meghalaya Pradesh Congress Committee (MPCC) Bah Vincent Pala baka Sorkar MDA ka nang tang ban kular hynrei kam lah satia ban pynurlong iaki jingkular.
Haba jubab iaki jingkynnoh u Marcuise ula ong “Ngi dang shu dep ka elekshon MLA 2023 bad lada ka National People’s Party (NPP) kaba ailam iaka Sorkar MDA kam trei, balei ki paidbah ki dang jied biang ia u Conrad K Sangma bad iaka Party jong u ban thaw Sorkar”.
U Marcuise ula ong ba kane ka jingjied biang ki paidbah iaka NPP ka pyni ba ka NPP kala trei bha naka bynta u paidbah bad ha kane ka kynti kaba ar, ka Sorkar Jylla haka jingialam u Conrad K Sangma kala sdang ban trei bha biang lyngba shibun ki rai jong ka kynhun Myntri Sorkar ki ban pynmyntoi iaki paidbah bad iaka Jylla.
Haba iadei bad ka jingkam ba ka Congress, kan jop ha baroh artylli ki Parliamentary Seat, kata ha Shillong bad Tura, u Marcuise ula ong “Ngam iohi baka Congress ka don kano kano ka jingkyrmen ba ka jop haka ilekshon MP Lok Sabha na Meghalaya ne ba kan wan biang haka bor ha Delhi”.
“Lyngba ki kam baka Sorkar Jylla haka jingialam ka NPP kala leh naka bynta ka bha ka miat ki paidbah bad ka Jylla baroh kawei. Nga thikna ba 100% ka NPP kan jop ha baroh artylli ki Parliamentary Seat”.
