Shillong, Kyllalyngkot 10: Ka GBHSS Artificial Football Ground, Tura, hynne ka sngi Balang, kala sakhi ia ka jingsdang ia ka jingkhmih bniah ia ki nongialehkai Football kiba iashimbynta ha ka 5th Meghalaya Games 2024.
Ki nongialehkai kila shah khmih bniah ba kidei ban pyndep katkum ki kyndon kiba la buh da ka Meghalaya Football Association, kaba kynthup naduh ka rta (kiba la kha hashwa lane hadien jongka 31 tarik u Kyllalyngkot 2006) bad ki kot ki sla kiban pynshisha iaka jaka shong jaka sah ki jong ki.
Ka kynhun na Ri Bhoi, East Garo Hills, South West Garo Hills, East Jantia Hills, West Jantia Hills, South Garo Hills bad West Garo Hills kila pyndep iaka jingshah khmih bniah.
Ki dang don sa katto katne ki kynhun kiba dang ap ban pyndep ia kane ka jsingshah khmih bniah ban pynthikna ba kin pyndep katkum ki kyndon kiba la buh ba kin ioh iashimbynta ha katei ka lympung iakob ialehkai.
Ka jingkhmih bniah ia ki ia ki kynthei kiba iashimbynta ha ka U-18 Girls’ Football kan long ha ka sngi Palei.
La banjur ba ka jingkhmih bniah lyngba ka jingpeit ia ki kot ki sla kum ka Aadhar ban pynthikna iaka rta, ki Birth Certificate bad kiwei kiwei.
Ki nongiashimbynta ki hap ban pynthikna iaka jak sah ka jongki katkum ka District kaba ki mihkhmat bad kito kiba mihkhmat ia kawei pat ka district kin hap ban aiti iaka No Objection Certificate (NOC) na ka District Sports/Football Association.
Ka jingthmu ban pynlong ia ka screening ka long ban peit ba kan don ka jingioh mihkhmat ki nongialehkai na baroh ki district bad kane ka jingkhmih bniah ka long kaba kongsan ban pynthikna ba kan long kaba khuid ba suba bad ka jingiakhun kaba biang ha ka Meghalaya Games 2024 kaban long noh shen.
