Nongstoin, K’lyngkot 09: Ka Auxilium Roilang Institute for Sustainable Empowerment (ARISE), Pyndengrei, Nongstoiñ hynne ka sngi Ba-ar, ka la sam ïa ki kor suhjaiñ sha ki samla kiba la pyndep ïa ka jinghikai pyntbit ha ka shlem ai jinghikai jong ka Institue.
Kine kiba ioh kor ki don don haduh 26 ngut bad ha kajuh ka por kitei ki samla kila ïoh ruh ïa ki syrnod lyngba ka jingithuh jong ka RADIANT INFONET NEW DELHI.
Ïa katei ka jinghikai ha katei ka shlem la bei tyngka da ka Meghalaya State Skills Development Society under Labour Department (MSSDS) hapoh ka jingkhmih ka Skills Meghalaya.
Mynta sa 24 ngut ki samla kila ioh rung thymmai ban sdang ïa ki jinghikai.
Ha kane ka jingïalang ba la pynlong ha phyllaw jong ka ARSTC Nongstoiñ, Pyndengrei, u bah Ewanmi Lyngdoh Mcs u la long kum u kongsan bad ka kong Memorial Khongkai, Skills Development Officer West Khasi Hills District kum ka symbud kongsan ha ryngkat ka jingïadonlang ki sister, ki brother bad u bah Michael Marweiñ sordar shnong Pyndengrei bad kiwei kiwei.
Haba ai jingkren ka kong Memorial Khongkai ka la kyntu ia ki samla ba kim dei ban buh pynsarang ïa ki sap bad jinghikai kiba la ïoh na katei ka shlem jinghikai hynrei dei ban nang ban ïeng ha la ki kjat ban kamai jakpoh namar kane ka sngi ka dei ka jingsdang ym kaba kut wat haba la dep pass ïa ka jingshah hikai.
