Agartala, Naitung 27: U MLA ba dang shu shah jied shen ka Congress u Sudip Roy Barman u la khot ia ki nongtrei ka party ban iatylli lang kawei ban iakhun ia ka thma pyrshah ia ka sorkar synshar BJP kumba long ha ka jingialeh laitluid ba la lamkhmat da ka party Congress pyrshah ia ki British.
U Barman u la ong, “Ka apot ia ka BJP ka dei ban long kum ki British. Kumba ki British ki la hap ban mih noh na kane ka ri, kumta ruh ka BJP kan shah pynher na ka bor ha ka juh ka rukom. Ka lynti iaid kan dap da ki jingialeh hynrei ngi hap ban iatylli bad ialam nakhmat,” u la ong shuh shuh.
Da ka ba kynthoh tyngeh ia ka BJP, u Sudip Roy Barman u la ong, “Ka BJP ka la sngewthuh bha ba ki sngi ba khatduh jong ka ki la hajan. Ka jingpynlong ia ki jingtohkit ka ba ia sylla sain hima pyrshah ia ki nongialam ka Congress, kata ia ka Sonia Gandhi bad u Rahul Gandhi ka dei ka nuksa ka ba pyni shai kdar ia ki jingshisha halor ka jinghiar sted ka jong ka. Ka lynti ka ba sah na ka bynta jong ki ka long ban pynjah burom pyrshah ia ki nongialam sain hima ki ba ia pyrshah,” ong u Barman.
Da ka ba kynthoh pyrshah ia heh saipan ki ba don ka jingiadei ka ba jan bad ka BJP, u Barman u la ong, “Hadien ba ka BJP ka la wan ha ka bor ki kam pynroi hapoh ka ri ki la hap ha ki kti jong ki khyndiat eh ki nongkhaii heh spah ki ba iajan bad ka saffron party. Ki paidbah nongshong shnong jong ka ri kin ym shah ia kane.”
Une u MLA Congress u la pynpaw ia kane ka ha ka jingialang jong ka party ha Gandhighat hapoh Agartala, Tripura ban pynpaw pyrshah halor ka jingkhot hajir jong ka ED pyrshah ia ka president ka seng Congress ka Sonia Gandhi.
Na ka liang u President ka seng Congress ka Tripura, u Birajit Sinha ha ba aijingkren ha ka jingialang u la ong ba ka Congress kan ym ailad bad kan ym pyndem wat tang khyndiat ruh ha ka sorkar synshar BJP.
“Ka BJP ka la jam palat ia u pud. Ki hok jong ki nongshong shnong ba la pynkhamti katkum ka synshar paidbah ki la ngat ha ki jingshah thombor. Ngi dei ban pynneh pat ia ka synshar paidbah ha Tripura bad ha ka ri baroh kawei. Ka Congress ka dei ka jingkyrmen ka ba khatduh na ka bynta ki nongshong,” u la ong shuh shuh.
Kumjuh na ka liang u MLA barim u Asish Saha u la ong, “Ngi baroh ngi dei ban iatylli lang kawei ban iakhun pyrshah ia ka BJP. Ia ki hok halor ki kam sain hima sima la pyniap noh da ka party ka ba don ha ka bor.”
