Guwahati, K’lyngkot 4 : Hadien ka jingaksiden kaba shim haduh 12 ngut ki mynsiem briew ba leit bam khana (picnic), ki Pulit ka Assam ha ka sngi Balang, kila pynmih ia ki kyndon jingbthah ia kiba leit bam khana, kaba khang ia ka iaid ka ieng ha ka por mynmiet bad bthah iaki nongleit bam khana ba kim dei ban pynheh jingtem hapoh ki kali.
Kawei ka bos kaba kit ia 45 ngut ki nongleit bam khana bad kaba dang leit sha Tinsukia, kala iatynrah bad kawei ka trok kaba wan mar pyrshah ha ka thain Balijan, Dergaon, bad ha kane ka jingjia, 12 ngut ki briew kila iap bad haduh 30 ngut tam kila mynsaw.
Haba pynphriang paidbah ia ka SOP iakiba leit bam khana ha X, ki Pulit ka Assam kila ong ba ym dei ban iashong khapngiah palat ha ki kali. Yn ym shah ia ki kali ban pynheh jingtem bad ba kam dei ban don ka iaid ka ieng jong ki nongleit bam khajna hashuwa ban mih sngi ne hadien ba sep ka sngi.
La ong ruh ba kam dei ban don ka jingiadie iathied kyiad hajan ki jaka bam khana bad la mana pyrshah ia ki nongniah kali ba kim dei ban dih kyiad shuwa ban niah kali.
La ong ruh ba ki Pulit kin pynlong ia ka jingkhynra ia ki dhaba kiba ju die ia ki kyiad pyrsi. La bhah ia ki nongleit bam khana ba ki dei ban pyntip sha ki Police Station ba marjan halor ka jaka ba ki mih bad ka jaka ba kin leit bam khana.
Ka SOP ka ong ba ki Pulit ki dei ban don ia ka kynhun peitngor bad lada donkam ban shim ia ka jingiarap jong ki VDP ha man ki jaka bam khana, ka ban iarap ban tehlakam ia ki kam die kyiad bad kiwei kiwei ki kam bymman ha ne marjan ki jaka bam khana.
