Shillong, Jan 2: Ka kynhun jong ka Meghalaya kaba iashimbynta ha ka U-19 Men’s kala wan baar ha ka Plate Group jong ka Cooch Behar Trophy 2023-24, hadien ba kala iakhaid noh bad ka Nagaland.
Kane ka jingiakhun kaba 4 sngi kala kut noh ha ka Lah Sngi u Blei ha ka jingiakhaid hynrei ka Nagaland kala ioh iaka nam lahduh hadien ba kila tam lypa haka jingialehkai ha ka wat kaba nyngkong.
Ha ka 29 tarik u Nohprah 2023, ka Nagaland kala tied nyngkong bad kamai 275 bad hap lut ki nongtied, ka Meghalaya kaba la leit ban tied kala kamai 234 run bad hap lut ki nongtied. Ka Nagaland kala bteng ban tied haka sien ka baar bad kala tied haduh ban da kut lut ki over ha ka 1 tarik u Kyllalyngkot da kaba buh hakhmat ba ka donkam tang ban shu iakhiad ia ka jingiakhun ban iohrah ia ka nam lahduh. Kumta ka Nagaland kala kamai 334 run bad hap 5 wiket ha ka jingleit tied ka baar sien ka jingka.
Ki nongkawang bol ka Meghalaya ha kane ka jingiakhun kila lehkai bha ha kaba u Shavian Blah ula shim 26 wiket bad u Angkit Tamang ula shim 25 wiket ha ki 7 tylli ki jingiakhun ha katei ka Tournament, katba u Pushkar Raj Singh ula kamai ia ka Century ne kamai 100 run tam ha ka Semifinal.
“Nga sngewsarong iaka rukom ialehkai jong ka U-19 Boy hadien ba kila lah ban khie biang na ki ar tylli ki jingiakhun kiba hakhmat bad kila kylla long kum ka kynhun kaba khlaiñ” ong u President ka MCA u Nababrata Bhattacharjee hadien ba la dep ka final.
“Ka kynhun kala ialehkai da ka mynsiem jong ka jingiakhun bad da ka jingiatylli bad baroh ki nongialehkai kila shim ia ka jingkitkhlieh bad kila ialehkai bha. Kin don beit ki nongialehkai kiba ym shim la poi pyrkhat kila lah ban ialehkai bha. Ka mynsiem jong ka jingiakhun bad ka jingtrei met bad mynsiem ka long kaba dei ban ai jingiaroh bad kim shym la kynran dien hynrei kila iakhun dohïap haduh ban da kut” ong u Naba.
Ula ong ba ki nongialehkai kidei ban sngewsarong namar kila ialehkai bha bad kila lah ruh ban long kum ki nongjop ha kaban pynrung iaka kynhun sha ka Elite Group kaban long ha ka samoi ban wan.
Ula President ka MCA ula ong ruh ba u don ka jingkyrmen kaba skhem ha ka kynhun ka Meghalaya kaba ialehkai ha ka U-16 Boys’ ha ka Plate Group Final jongka Vijay Merchant Trophy kaban sdang naduh lashai ka sngi ha Jamshedpur ha kaba kan iakhun pyrshah iaka Manipur.
