Shongkun ka jingrakhe lyngkhuh sngi iap u Kiang Nongbah
Shillong, Nohprah 30 : Ki kynhun Sengbhalang ba ieng pyrshah ia ka jingrung kyrthep ki bar jylla bad mynder ri ha Jylla, hynne ka sngi Saitjain kila dawa ia ka Sorkar Jylla bad baroh ki seng sain pyrthei ba kin sangeh shuwa ia ka jingpyrkhat ban wanrah lynti rel ha Ri-lum Khasi Jaintia kat bym pat don ki ain kum ka Inner Line Permit (ILP), kaba dei ka jingdawa kaba la slem bha ban iada ia ki trai paid riewlum na ka jingkylla rit paid hala ka jong ka Ri.
Kane ka sur ki Sengbhalang kala mih na ka jingialang kynmaw burom ia ka lyngkhuh sngi iap ba 161 snem jong u Khla wait ka Jaidbynriew Woh Kiang Nongbah kaba long hynne ka sngi.
Haba kren ha ka jingialang kaba long hakhmat u mot ba shi ryngieng jong u Woh Kiang Nongbah ha Barik Point, Shillong, u President ka KSU samla Lambokstar Marngar ula on gong ba ka Meghalaya kan dang don don ia ki ain kiba khlain ban tehlakam ia ka jingrung kyrthep ki briew ba nabar. Namar kata, ka Sorkar Jylla bad baroh ki seng sain pyrthei ki dei ban sangeh ha kaban pynbor ia ka jingwan rah lynti rel ha Ri-lum Khasi Jaintia.
“Nga shaiong ban iohi ba ki don ki briew ha ka Liang Synshar, kiba ju kren barabor halor ka jingdonkam ban wanrah lynti rel ha Ri-lum Khasi Jaintia. La I kumba kine ki briew kim don eiei ban leh lait na ka jingiakren ia ka lynti rel” ula ong.
U samla Lamborstar ula ong, ki paidbah ka Jylla ki khmih lynti ba kane ka Sorkar bad kito kiba don ha ka bor ba kin shimkhia ia ki ishu kiba iadei bad ka jingbym iohkam iohjam ki samla, ki jingeh jong ki samla pule, ka jingbym biang ha ki lad ai jingsumar, ki prokram sengkam lajong ban aikam aijam bad kiwei kiwei.
“Ngi kwah ia ka Sorkar Jylla bad ki seng sain pyrthei ba kin pynleit jingmut halor ka jingdonkam ban pynkylla dur ia ka pule ka dangle, ka koit ka khiah, ban kyntiew ia ka kamai kajih ki paidbah ha ki shnong nongkyndong, ban leh eiei halor ka jingeh ki nongrep bad ka jingbym iohkam ki samla ha ka Jylla” ula bynrap.
Ula pyntip ba ha u snem 2017, haduh 33 ngut ki dkhot ka KSU kila shah kem na ka jingiakhih pyrshah ia ka jingthmu wanrah lynti rel hapoh ka Jylla.
“Namar kata, ngi kwah ban phah ia ka khubor kaba shai sha ka Sorkar ba ka KSU lem bad kiwei ki kynhun kin iai bteng ban iakhih pyrshah ia kano kano ka jingthmu ban wanrah jubor ia ka lynti rel ha Ri-lum Khasi Jaintia tad haduh ba ka Jylla kala don ia ka Ain kaba khlain ban pyrrkhing ia ka jingrung kyrthep ki briew ba nabar ka Jylla” ula ong.
Haba pynsawa ia kane kajuh ka sur ha ka jingbuh syntiew ha Jowai, u General Secretary ka JSU Trebor Suchen ula ong ba ka Seng kala ieng skhem ha ka nongrim ban pyrshah ia ka jingthmu ban wanrah lynti rel ha East Jaintia Hills District.
“Ngim pat ju mynjur ia ka lynti rel ba kan wan ha ka District jong ngi. Ngi pyrshah jur ia ka” ula ong.
Kat kum ka jingong jong u, ki paidbah kin mynjur bad pdiang ia ka lynti rel tad hadien ka jingpyntrei kam ia ka ILP hapoh ka Jylla.
