New Delhi, Nohprah 31 : Ka India kala sakhi ia ka jingnang kiew ha ka jingdon ki briew ba iabit ia ka jingpang Covid-19 bad tang ha kine ki 24 kynta bala leit noh, haduh 841 ngut kila iabit thymmai ia ka jingpang, kaba bunduh haba nujor ha kine ki 227 sngi.
Kat kum ka jingpyntip ka Health Ministry, haduh 4309 ngut ki briew kila kit ia une u khniang jingpang hapoh ka Ri.
La iathuh ba 3 ngut ki briew, uwei na Kerela, Karnataka bad Bihar kila iap hapoh kine ki 24 kynta bala leit noh.
Ha ka por ba jur ka jinglynshop ka khlam ha ki sdang snem jong u 2020, ka jingdon ki nongpang Covid hapoh ka Ri kala kot da ki lak ngut shisngi. Tang hapoh saw snem, ka Ri kala kot haduh 4.5 klur ngut kiba iabit ia ka jingpang bad palat 5.3 lak ngut kila iap.
Haduh 4.4 klur kila ioh pat ia ka jingkot, kaba pynkot haduh 98.81% ka jingioh koit, ai jingkhein ka Health Ministry.
Kat kum ka website ka Health Ministry, haduh 220.67 klur ki injek dawai iada covid lah dei ban ai hapoh ka Ri baroh kawei.
