Shillong, Nohprah 19: Shi sngi hadien ka jingleit kyrshan u MDC ba shu siej (Nominated MDC) Bah Bindo Lanong, hynne ka sngi Ba-ar sa u MDC ka Nongkrem Constituency Bah Lambor Malniang u la leit ban kyrshan ia ka Executive Commitee (EC) jong ka Khasi Hills Autonomous District Council (KHADC) ba ialam da ka National People’s Party (NPP).
Ia u bah Lambor la pdiang sngewbha da u CEM ka KHADC hapoh ka ophis treikam haka jingdon lang ki Executive Member (EM) ka District Council.
Lah ban kdew ba iaka EC hapoh ka KHADC la lamkhmat daka National People’s Party (NPP) bad ka Congress hapoh ka lama jong ka kynhun synrop Khasi Hills Democratic Front (KHDF).
Haba kren sha ki lad pathai khubor u bah Lambor ula ong ba kane ka rai ban kyrshan ia ka EC ba ialam u bah Pyniaid ka long namar ka jingpyntrei bha iaki kam ka District Council kiba dei naka bynta ka bha ka miat ki paidbah ka Jylla.
U Bah Lambor u la iathuh ba kane ka jingkyrsan kam dei ba un iasoh noh shaka kano kano ka Party hynrei ka long tang ban ioh ka lad ban ai ka jingshakri ba pura sha u paidbah lyngba ka jingdon bynta haka EC.
“Hadien ka jingshimti u bah Pyniaid kum u CEM, nga iohi ia ka jingpyntyllun sted ia ki kam jong ka District Council ki ban tei iaka bha ka miat jaitbynriew da ka ba wanrah ia ki Bill ba kongsan kynthup ia ka Clan Bill ka ba donkam bha na ka bynta ka jaitbynriew” la ong u Bah Lambor.
