Shillong, Nohprah 19 : Ka Sorkar Jylla kala bthah ia u Deputy Commissioner ban aiti ia ka kaiphod kaba bniah kaba don lang ia ki map, u snem ba sdang kyntur pud bad ka dor jong ka jaka Sorkar ba shah kyntur ha Tura, West Garo Hills.
Kane ka rai kala mih na ka jingialang jong ka Kynhun Myntri kaba long hynne ka sngi Ba-ar.
Haba iakren bad ki lad pathai khubor, u Myntri Rangbah ka Jylla Conrad K Sangma ula ong ba kane ka dei ka kam bala sahteng la slem bha kaba la ktah ia ka Tura bad ka Sorkar kala rai ba dei ban wad ia ka lynti ban jam shakhmat bad ban pynbeit ia kane ka kam.
U Conrad ula iathuh ba ka don bun bah ki jaka Sorkar kaba la shah tuh ha ki paidbah, kiba dei jong ki Tnad bapher bapher.
Ula pynkynmaw ba kum kane ka jingjia kala jia ruh ha Williamnagar ha kaba ka Sorkar kala pynbeit ia ka hok longtrai ia ki jaka Sorkar ha ryngkat u paidbah bad kala don ruh ka jingiakren ba sani bha bad haba kut la mynjur ban shu shim noh da ka baiwai na kine ki briew ba kyntur.
U Conrad ula ong baka jingtyrwa kala wan ban leh lang kumjuh ia ki jaka ha Tura kumba leh ha Williamnagar.
“U Deputy Commissioner ula pynlong ia ka jingwadbniah bad ula aiti ia ka kaiphid bad ula pan ia ka jingbit jong ka Kynhun Myntri ban pyniaid shakhmat ia ka kam ha kaban iakren bad iapynbeit noh bad kine ki briew. Ki don bun tylli ki jaka Sorkar ha Tura ba shah kyntur pud khamtam ha Walbagre, Dakopgre bad wat marjan ka Civil Hospital” ula ong.
U pyntip ba ka Sorkar hi kam sngew iahap ban shu kyndang ne beh ia kine ki briew kiba shong la sah da ki bun bun snem ha kine ki jaka bad kumta, ka jingiakren kan iaid ba kin shu siew noh da ka baiwai sha ka Sorkar.
“Lait noh satang lad aka Sorkar ka donkam ia ka ban pyntrei ia ki project ba kongsan kum ka nuksa, lada donkam ia kano kano ka jaka ban shna pynheh ia ki jaka sumar lane ka jaka ban shna ia ka Ophis MPSC, ka Sorkar kan pyrshang ban wad ia ka lad ka lynti ban iapynbeit da ka jingiamynjur lang ia kine ki jaka ba shah kyntur” ula ong.
