Shillong Nohprah 18: U Myllung Soso Tham, udei u nongthoh uba pawnam jongka jaidbynriew Khasi bad la kha ia u ha u snem 1873 ha Sohra, Meghalaya.
U Soso Tham, udei u nongtbeh jingshai haka thoh ka tar jong ki Khasi bad udei u nongthoh uba la pawnam ia kaba ka jaidbynriew kan iai kynmaw junom ia ka synniang ka jongu lyngba ki jingthoh ki bapher bapher.
Une u Myllung ula sdang trei kum u nonghikai skul bad ula hikai ia ka sobjek Khasi ha Government High School, Shillong naduh u snem 1905 haduh ban da shongthait syndon ha u Naitung jong u snem 1931.
U Soso Tham udei u nongthoh uba la iar ka pyrkhat ka pyrdaiñ ka jongu bad kane kala paw lyngba ki jingthoh ki jongu ha kaba ula pynwandur ha kiba bun ki rukom bad ka jngthoh ruh ki long kiba kordor bha ia kaba ula pyniasoh bad pyniakhleh lang ba ka riti dustur tynrai u Khasi.
Ula thoh ia ki ar tylli ki Poitri kiba la pawnam bha kiba kynthup ia ka “Ka Duitara Ksiar” ha u 1925 kaba kynthup ia ki 46 tylli ki poitri lyngkot kaba don ia ki jingpynwandur ia ki kyntien, ballad bad 14 tylli ki poitri phareng kiba la pynkylla shaka Khasi bad ka kot poitri “Ki Sngi Ba Rim U Hynniew Trep” ha u snem 1936, bad kane kadei ka kot kaba kordor bad kaba kit jingmut bha bad kadei kaba la ngam jylliew bha ha kaba iadei bad ka histori jong ki paid ka Bri u Hynniew Trep.
U Soso Tham ula pynkylla ruh sha Khasi ia ka Aesop’s Fables da kaba ai kyrteng ki Phawer u Aesop ia kaba ia kane ka kot kadei kaba la ioh ia jingiaroh na kiba bun balang bad kadei ruh kaba la pdiang da baroh.
Nalor kane ula pynkylla ruh sha ka ktien Khasi iaka kot jong u Charles Dickens ka “The Life of Our Lord” bad ia ka kot jong u Shakespeare kaba la tip kum ka “The Tempest,” ia kaba ula ai kyrteng “U Kyllang,” hynrei kaba sngewsih kane ka jingthoh kaba ula pynkylla sha Khasi kala jah noh.
Ka jingtrei shitom une u Myllung kala kyntiew shajrong ia ka ktien Khasi bad la shim ruh ba une u Myllung udei u nongthoh uba khraw tam ha ka histori jong ka litreshor ha ka jylla Meghalaya bad iaki kot jong une u Myllung la pyndonkam ha ki skul bad ki kolej.
U Soso Tham ula khlad noh ha ka 18 tarik u Nohprah 1940 bad ka jingnoh synniang ka jongu ha ka pule puthi ka la long shisha kaba khraw bha bad kum ka dak ban pynsahnam ia une u khraw pyrkhat ha ka thoh ka tar la pynieng ia u mot sahnam jong u Soso Tham ha u snem 1975 ha State Central Library Shillong bad wat ia ka Hall ha kane ka jaka ruh la ai kyrteng da ka Soso Tham Auditorium.
