Dibrugarh, Nohprah 16: U MLA barim ka Arunachal Pradesh Yumsem Matey, ula shah siat iap ha ka kynhun ki ehrang kaikhlaw ha ka shnong Rahu kaba hap hapoh ka Lazu Police Station jong ka Jylla Arunachal Pradesh hynne ka janmiet sngi Saitjain.
Kat kum ka khubor, une u MLA barim ula leit iashimbynta ha ka jingialang ha ka shnong Rahu kaba hap hapoh ka Tirap District hynne ka janmiet bad ka kynhun ki samla kila rahbor ia u shajan ka khappud India-Myanmar bad siat iap syndon ia u.
U Matey u dei u MLA ka Khonsa (West) naduh u snem 2009-2014 na ka ticket jong ka Congress bad ha u snem 2015 ula leit ban pyniasoh ialade sha ka BJP.
U dei u kyrtong uba la pynkhreh ban iakhun ia ka elekshon MLA ban wan na Khonsa (West).
“Une u MLA barim ula shah patan sha khappud India-Myanmar bad shah siat iap ha ki kynhun kaikhlaw. Hynrei ym pat lah ban tip ka kynhun kaikhlaw aiu kaba leh ia kane ka kam” ong ki heh Sorkar.
Na ka liang ki bor pahara, kila pynlong ia ka jingkhynra kaba jur ban iohkem ia kine ki kaikhlaw kiba donkti.
Ha u snem 2019, u MLA ka West Khonsa Tirong Aboh lem bad 10 ngut ki nongkyrshan jong u, kila shah thombor ha ka kynhun ki kaikhlaw ha Bka shnong Bogapani kaba hap hapoh ka Tirap District.
Ka Tirap, Longding bad Changlang(TLC) jong ka Arunachal Pradesh ki dei kiba la shah pynbna kum ki disturbed area bad kila shah pynhap hapoh ka AFSPA ha ka MHA.
