Shillong, Nohprah 15 : Ka Tnad Custom kala ioh kem ia uwei u nongkhaii ksiar tuh bad ioh kurup ia bun bah ka ksiar ba shongdor haduh T. 1.42 klur na ka surok Diengpasoh, East Khasi Hills District.
Ia kane ka ksiar la ioh ban kurup na kawei ka Maruti EECO ha ka janmiet 13 tarik, ha ka jingkhynra ha ka thain Diengpasoh.
Ka Commissioner of Custom Preventive (CCP), kaba la pynlong ia kane ka jingkhynra halor ka jingioh khubor ba ka don ka jingpynrung tuh ia bun bah ka ksiar na khappud, kaba la pynkit da kawei ka kali kaba thmu leit sha Barpeta.
Ha ka jingtalasi ia kane ka kali, ka CCP kala ioh ban kurup haduh 20 tylli ki biskit ksiar bala song da ka tape rong iong. Ka jingkhia jong kine ki ksiar kala kot ia ka 2331.82 gram bad ka shongdor haduh T. 1.42 klur.
Ka CCP kala ioh ban kem ia u nongniah jong kane ka kali bad ka jingtohkit mynta kala iaid shakhmat.
Ha kawei pat ka jingjia, ha ka sngi Palei, ka Tnad Custom kala ioh ban kurup haduh 50 byrni u rynsun China ba khia haduh 950 gram, uba la shalan tuh na khappud.
Une u rynsun u dei jong ka kompani ba ai kyrteng Huanguang. Ka jingtohkit mynta kala iaid shakhmat.
